Thaçi e Vuçiq sot vazhdojnë dialogun në Bruksel

Sot në Bruksel vazhdojnë bisedimet Kosovë-Serbi me ndërmjetësimin e Bashkimit Evropian.

Presidenti Hashim Thaçi do të takojë homologun serb Aleksandar Vuçiq, edhe pse zyrtarët serbë paralajmëruan mundësinë e dështimit të këtij takimi në shenjë proteste për taksën për 10% që Qeveria e Kosovës ka vendosur para pak ditësh për prodhimet e Serbisë dhe ato të Bosnjës.

Në një intervistë për KosovaPress Thaçi gjatë ditës së djeshme ka thënë se me më dëshirë do të dialogonte me një dreq, se me presidentin serb, duke përsëritur se takimet e tilla janë të vështira.

Lexo po ashtu Thaçi: Më me dëshirë do të dialogoja më një dreq, sesa me Aleksandar Vuçiqin

Ky është takimi i katërt i fazës finale për arritjen e marrëveshjes mes dy vendeve.

Në një njoftim të zyrës së shefes së politikës së jashtme të BE-së Federica Mogherini, të lëshuar dje, thuhet se “në takim pritet që të dy presidentët të konfirmojnë gatishmërinë e tyre për intensifikimin e punës për të arritur një marrëveshje të detyrueshme ligjore për normalizimin gjithëpërfshirës të marrëdhënieve, që është thelbësore për rrugën e tyre evropiane”.