Takimi i së hënës dhe plani evropian, Szunyog: BE-ja pret që Kosova dhe Serbia ta pranojnë, Bislimi nuk përgjigjet

Shefi i Zyrës së Bashkimit Evropian, Tomas Szunyog, ka thënë se BE-ja pret që Kosova dhe Serbia ta pranojnë propozimin evropian dhe të angazhohen në mënyrë konstruktive në bisedime se si të zbatohet ajo.

Szunyog tha se arritja e marrëveshjes Kosovë-Serbi do të jetë shumë e rëndësishme për integrimin evropian të tyre.

“Ajo që është e nevojshme të thuhet është thënë nga Lajçaku. Dukshëm presim që të dyja palët të pranojnë propozimin evropian dhe të angazhohen në mënyrë konstruktive në bisedime se si të zbatohet ajo. Është shumë e qartë dhe kjo nuk është informatë e re që ne kemi besuar që për të dy palët marrëveshja e dialogut është shumë e rëndësishme për integrimin evropian”, tha Szunyog.

Për planin evropian e për takimin e së hënës së Bruksel është pyetur edhe zëvendëskryeministri Besnik Bislimi, mirëpo i njëjti tha se është e “padenjë” të përgjigjet aty për këto pyetje.

Ai është arsyetuar se konferenca ka të bëjë me programin “IPA 2023” dhe se është program shumë i rëndësishëm për qytetarët që të flitet për diçka tjetër në të.

“Pyetja e parë fillon ‘të hënën në Bruksel’, mendoj se është disrespekt për gjithë këtë punë, këtë program prej të cilit përfitojnë qytetarët. Po më duket pak e padenjë të përgjigjem për pyetjen që e keni për momentin”, tha ai, raporton kp.