Suspendohet nga puna doktori nga Podujeva që refuzoi pacientin e moshuar

Drejtori i Shëndetësisë në Podujevë, Driton Veliu, ka njoftuar se është suspenduar nga puna doktori i cili ka refuzuar të kontrollojë një pacient të moshuar, me arsyetimin se e ka kryer orarin e punës.

Veliu thotë se sjella e doktorit është e papranueshme, transmeton Telegrafi.

“Një video që po qarkullon në rrjete sociale, ku shihet sjellja jo e mirë e një mjeku në QKMF në Podujevë ndaj një pacienti të moshuar, është e papranueshme dhe nuk përkon as me etikën profesionale.
E kuptoj se personeli shëndetësor është lodhur e dërmuar nga situata që po kalojmë në ballafaqimin me COVID-19, kurse gjendjen e bën edhe më të rëndë mungesa e stafit mjekësor në QKMF, pas shkuarjes në specializim të 12 mjekëve. Mirëpo, tërë kjo nuk e arsyeton një sjellje të tillë të mjekut, aq më pak ndaj një pacienti të moshuar”, thotë ai.

Veliu pohon se doktori është suspenduar përkohësisht nga marrëdhënia e punës deri në një vendim të ri të Komisionit Disiplinor.

“Lidhur me këtë rast, Këshilli Drejtues i QKMF-së dhe pas analizës së këtij rasti, Këshilli kanë vendosur që mjeku të suspendohet përkohësisht nga marrëdhënia e punës deri në një vendim të ri të Komisionit Disiplinor. Duke shprehur keqardhje për këtë rast, jam i sigurt se kjo nuk e zbeh dhe nuk do të ndikojë në punën dhe angazhimin e stafit shëndetësor të QKMF në Podujevë në këtë periudhë pandemie në ofrimin e shërbimeve shëndetësore”, deklaroi ai.

Ndryshe, një video që ka qarkulluar në disa media shihet një doktor në Podujevë duke refuzuar ta kontrollojë pacientin e moshuar, madje në një moment ai kërkon nga familjari i tij që të dalin jashtë QKMF-së, duke ia hapur derën. /Telegrafi/