Sulmohet ambasadori i BE-së në Sudan

Ambasadori i BE-së në Sudan është sulmuar në shtëpinë e tij në Khartoum, tha kryediplomati i BE-së Josep Borrell, raporton BBC.

Borrell nuk zbuloi asnjë detaj të sulmit, por një zëdhënëse e BE-së tha se ambasadori ishte “në rregull”, transmeton Telegrafi.

“Siguria e ambienteve diplomatike dhe stafit është përgjegjësi kryesore e autoriteteve sudaneze”, shkroi Borrell në Twitter.

Megjithëse Borrell nuk e përmendi emrin e tij, ambasadori i BE-së në Sudan është Aidan O’Hara, një diplomat irlandez.

Lexo po ashtu I vranë 60 anëtarë të familjes, nën kontrollin e tij janë 100 mijë ushtarë dhe disa miniera ari – sudanezi që u bë “mjeshtër” i jetës dhe vdekjes

BBC ka kontaktuar zyrën e O’Hara. Zëdhënësja e BE-së, Nabila Massrali, tha për AFP se “siguria e stafit është prioriteti ynë” dhe se delegacioni i BE-së nuk është evakuuar nga Khartoum pas sulmit.

Ajo tha se po vlerësonin masat e tyre të sigurisë. E hëna shënoi ditën e tretë të luftimeve të Sudanit midis ushtrisë dhe një grupi paraushtarak të quajtur Forcat e Mbështetjes së Shpejtë (RSF).

Të dyja palët pretenduan se kontrollonin vendet kryesore në Khartoum, ku banorët ishin strehuar nga shpërthimet.

Më shumë se 1800 civilë dhe luftëtarë janë plagosur sipas Volker Perthes, i dërguari i Kombeve të Bashkuara për Sudanin. Ai u tha gazetarëve të hënën se rreth 185 njerëz kishin vdekur. /Telegrafi/