Southgate kritikohet ashpër për deklaratën se në Katar nuk janë shkelë të drejtat e njeriut

Trajneri i Anglisë, Gareth Southgate është vënë nën kritika nga grupet e të drejtave të njeriut pasi pretendoi se punëtorët në Katar janë të bashkuar në dëshirën e tyre që Kupa e Botës të vazhdojë.

Katari, i cili do të presë turneun nga 20 nëntori, është kritikuar ashpër për të drejtat e njeriut dhe kushtet ndaj të cilave janë nënshtruar mijëra punëtorë migrantë që ndërtojnë stadiume dhe infrastrukturë.

Vendi i Lindjes së Mesme është kritikuar gjithashtu për ligjet e tyre anti-LGBTQ+.

Në një intervistë me CNN, Southgate tha: “Unë kam qenë në Katar disa herë dhe jam takuar me shumë punëtorë atje dhe ata janë të bashkuar me siguri në një gjë – kjo është se ata duan që turneu të ndodhë, dhe ata e duan këtë sepse e duan futbollin”.

“Ata duan që futbolli të zhvillohet në Katar”.

Një raport i publikuar vitin e kaluar tha se 6,500 punëtorë migrantë kishin vdekur në Katar. Autoritetet në Katar e mohojnë kategorikisht këtë.

Dhe një studim nga Amnesty International i publikuar muajin e kaluar – ‘Biznes i papërfunduar: Çfarë duhet të bëjë Katari për të përmbushur premtimet për të drejtat e punëtorëve migrantë’ – zbuloi se mijëra punëtorëve ende po u mohohen pagat ose po u vonohen ato, po u mohohen ditët e pushimit dhe po ekspozohen ndaj kushteve të pasigurta të punës.

Komentet e Southgate u qortuan nga Amnesty, i cili tha se të drejtat e punësimit janë një shqetësim më i madh për këta punëtorë. /Telegrafi/