Sot protesta të “Revolucionit laraman” në 13 qytete

Protesta e “Revolucionit laraman” sot në Shkup do të fillojë në ora 18. Në të njëjtën kohë fillon edhe protesta në Manastir. Tridhjetë minuta më vonë në Veles dhe Kavadar, transmeton Telegrafi Maqedoni.

Në ora 19 do të ketë protesta edhe në Kriva Pallankë, Berovë, Shtip, Strumicë, Radovish, Resnjë dhe Prilep. Në ora 20 është paralajmëruar protesta në Demir Hisar. Para dy orësh kanë filluar bllokadat e rrugëve tek fshatrat e Berovës, Mojmirovë dhe Maçevë.

„Kërkojmë anulim urgjent të vendimit për mbajtjen e zgjedhjeve më 5 qershor dhe anulim urgjent të vendimit për falje të atyre kundër të cilëve është iniciuar akuzë nga PSP! Kërkojmë mbrojtje të PSP dhe garanci se ky institucion do të vazhdojë të veprojë pa asnjë pengesë dhe në interes të drejtësisë në Maqedoni. Gjykata kushtetuese urgjentisht të deklarohet për kushtetutshmërinë e PSP dhe të mundësohet që kriminelët të dënohen në mënyrë adekuate! Për Maqedoninë do të flitet dhe do të negociohet në Shkup, ndërsa në zgjedhjen e krizës duhet të përfshihen edhe përfaqësues të shoqërisë qytetare. Më në fund, kërkojmë, dorëheqje nga jo-kryetari Ivanov, formim të departamentit special të Gjykatës penale, kompetent për rastet e PSP dhe kërkojmë formim të qeverisë kalimtare e cila deri në fund do ti zbatojë prioritetet urgjente reformuese nga raporti i Pribe“!, thonë nga “Revolucioni laraman”./Telegrafi