Sot në Kodrën e Diellit promovohet projekti “Ulja e rrezikut nga vërshimet në rajonin e Pollogut”

Ministri i Mjedisit Jetësor dhe Planifikimit Hapësinor, Sadulla Duraku, sot në Kodrën e Diellit do të merr pjesë në promovimin e projektit të ri për “Uljen e rrezikut nga përmbytjet në rajonin e Pollogut”.

Projekti është i financuar nga Agjencia Zviceriane për Zhvillim dhe Bashkëpunim dhe Sekretariati Shtetëror për Çështje Ekonomike të Zvicrës, ndërsa do të realizohet gjatë katër viteve të ardhshme përmes programit për zhvillim të OKB-së (UNDP), në partneritet me Ministrinë e Mjedisit Jetësor dhe Planifikimit Hapësinor, komunat nga rajoni dhe një numër i madh i institucioneve të nivelit kombëtar dhe lokal, përcjell Telegrafi Maqedoni.

Në këtë ngjarje do të nënshkruhet marrëveshje mes Qeverisë së Maqedonisë dhe Qeverisë së Konfederatës së Zvicrës për ndarje të ndihmës teknike dhe financiare për realizim të projektit “Përmirësim i shërbimeve për menaxhim dhe mbeturina në rajonin e Pollogut”. Projekti është në vlerë prej 1.900.000 frangave zviceriane dhe duhet të përfundojë deri në qershor të vitit 2020./Telegrafi/