Skoda do të shkurtojë 3,000 vende pune nëse ligji ‘Euro 7’ do të zbatohej në formën aktuale

Prodhuesit çek të veturave Skoda, do t’i duhej që të shkurtonte 3,000 vende pune dhe t’i largojë nga prodhimi disa modele nëse skema e Bashkimit Evropian për emetimin e gazrave “Euro 7”, do të zbatohet në formën aktuale, paralajmëroi një anëtar i bordit të Skoda në një debat televiziv të dielën.

Ligji i propozuar Euro 7, të cilin vendet dhe deputetët e BE-së do të fillojnë që ta negociojnë këtë vit, do të ngushtojë kufijtë e emetimeve të ndotësve që e dëmtojnë shëndetin, duke përfshirë edhe oksidin e azotit.

Bashkimi Evropian ka bërë të ditur se përfitimet e shëndetit nga kjo masë do të tejkalojnë kostot, por disa prodhues të veturave kanë paralajmëruar se në fakt ligji i propozuar do të imponojë kosto të paarritshme dhe të shtrenjta të zhvillimit.

Shefi i Daimler Trucks, Martin Daum, më 10 mars tha se kjo do t’i kushtonte industrisë “miliarda” euro, raporton Reuters, transmeton Telegrafi.

“Nëse ligji Euro 7 do të aprovohet në këtë formë, për Skoda Auto do të thotë mbyllje e një fabrike, kjo për shkak se do të ndalonte prodhimin e modeleve më të vogla si Fabia, Scala dhe Kamiq, e që si shkak i saj do të shkurtoheshin më së paku 3,000 vende pune”, deklaroi në një debat televiziv Martin Jahn, anëtar i Skoda-s, firmë kjo e cila është pjesë e Volkswagen Group.

Në përgjithësi, në Republikën Çeke do të rrezikoheshin mbi 10,000 vende pune, kjo pasi që sipas Jahn do të përfshinte edhe furnizuesit e Skoda-s.

Tre modelet më të vogla përfaqësonin gati një të tretën e dërgesave të Skoda për klientët në vitin 2022.

Ministrat e transportit nga Republika Çeke, Gjermania, Italia, Polonia, Portugalia, Rumania, Hungaria dhe Sllovakia u takuan të hënën për të diskutuar përpjekjet e tyre për të ndryshuar propozimin e ligjit Euro 7. /Telegrafi/