Lajme Kosovë

S’ka material për dokumente personale – qytetarët ankohen e nga Ministria e Punëve të Brendshme heshtin

Qytetarët nuk po mund të pajisen me dokumente personale, si letërnjoftim, pasaportë e patentë-shofer në mungesë të materialit bazik për prodhimin e tyre, ndonëse në fund të janarit nga Ministria e Punëve të Brendshme u tha se janë pajisur me një pjesë të materialit bazik për prodhimin e dokumenteve.

Telegrafi ishte para objektit të Agjencisë së Regjistrimit Civil (MPB), aty ku qytetarët shkojnë për të aplikuar apo marr dokumentin përkatës, por që shumica prej tyre që dilnin nga kjo zyrë tregonin se nuk kanë kryer punë, kjo pasi në Agjencinë e Regjistrimit Civil që funksionon në kuadër të MPB-së, nuk ka material bazik për t’i prodhuar këto dokumente.

Qytetari, Zenel Kryeziu kishte ardhur për të shikuar nëse i ka dal ose jo patentë shoferi për nusen e djalit të tij.

Ai tha se ende nuk ka marr ndonjë përgjigje nga zyrtarët pse po i vonohet kaq shumë marrja e këtij dokumenti.

“Me këqyr për patentë shofer, s’po muj me kuptu çka është kjo punë. Nuk ka material. Kurrfarë përgjigje s’më kanë kthyer hiç. Se di çfarë përgjigje është kjo. Njeriu ka humb vendin e punës për leje. Ajo është në Slloveni, e po mendon që është si atje”, ka thënë Kryeziu.

Po ashtu edhe Naim Ramizi, ka ardhur në këtë zyrë për të njëjtën arsye.

Ai tregoi shqetësimin e tij se ende ka mbetur pa patentë shofer.

“Për patentë shofer, thanë nuk ka. Të 15 tetorit sot kanë ardh 7 copa. Thanë që nuk e dinë se kur mund të vinë. Materiali bazik mungon. Nuk mund të kryej shërbimet e mia ditore. Kerri sot nuk është luks, por nevojë familjare, personale, pune dhe krejt”, tregoi shqetësimin e tij.

Një tjetër qytetare tha se nuk arriti të marr letërnjoftimin e babait të saj edhe pse i nevojitet urgjentisht.

“Nuk kreva, kam pas dje letërnjoftimi me procedurë të përshpejtuar. E kam babën në spital por nuk ma kishin kry, e pritshin një vërtetim. Edhe atje në Shkup administrata pak me ngadalësi. Sot prapë hyri në procedurë e për nesër mëngjes duhet me marr”, u shpreh ajo.

Ndërsa, qytetarja tjetër Hidajete Çunaku sot ka aplikuar për pasaportë, por sipas saj, zyrtarët e Agjencisë për Regjistrim Civili i kanë thënë se për disa muaj nuk mund ta marr.

“Jo, se thanë nuk ka material. Kam ardh me apliku për pasaportë e thanë s’ka material. Ju thash ‘kam dëgju nëpër media që ka material’, e më tha s’ka asgjë zyrtarisht, e më kanë qit jashtë. Sot aplikova hera e parë. E pyeta sa duhet me prit, thash një muaj? Jo tha edhe më shumë prej shtatorit nuk ka material. Unë ju thash që kam dëgju nga mediat, më thanë që ke dëgju fjalë të kota se nuk material”.

Edhe qytetarja Salije Hyseni tregoi që zyrtarët e kanë njoftuar se nuk ka material bazik. “S’kemi material, e nëse e ke urgjent duheni mu lajmëru. Po shyqyr se kemi urgjent, e s’kish pas kallaballëk”, ka thënë Hyseni.

Ndryshe, Telegrafi është munduar në vazhdimësi javën e fundit që të marr një përgjigje nga zyra e informimit të Ministrisë së Punëve të Brendshme, mirëpo të njëjtit nuk kanë qenë të qasshëm.

Në fund të muajit janar nga Ministria e Punëve të Brendshme (MPB), kishin thënë se ishin pajisur me material bazik për prodhimin e dokumenteve personale si pasaporta dhe patentë-shofer.

Këtë e kishte bërë të ditur zëdhënësja e MPB-së, Nora Fetoshi, në një prononcim për Telegrafin, sipas së cilës ishte thënë se “Ashtu siç kemi premtuar, një pjesë e materialit bazik për prodhimin e dokumenteve personale ka arritur në Kosovë gjatë kësaj jave. Në fillim të muajit shkurt dhe mars do të arrijë pjesa tjetër e materialit, bazuar në kontratë. Gjendja aktualisht është stabilizuar dhe qytetarët janë duke u pajisur me dokumente persona”.

Ndryshe, Kosova ende është duke u përballur me mungesë të materialeve për prodhimin e disa dokumenteve që nga muaji tetor i vitit të kaluar.

Ndërsa, më 7 janar, ishte raportuar se ministri i Punëve të Brendshme, Xhelal Sveçla, i kishte dërguar letër zyrtare shtetit të Gjermanisë me lutje që të lejojë udhëtimin e shtetasve kosovarë me pasaporta të skaduara deri në zgjidhjen e situatës. /Telegrafi/