Sinan Vllasaliu më në fund takohet “Me Gjylen” në episodin festiv të serialit humoristik

Seriali humoristik “Me Gjylen” ka publikuar episodin e shumëpritur festiv për të shënuar fundvitin me humor, dashuri dhe një dozë të mirë nostalgjie.

Në këtë episod special, banorët e këtij seriali të dashur përballen me emocionet e festave, ngjarje të papritura dhe një mik të veçantë që ndez atmosferën.

Selatini, i cili ka rënë në një situatë të vështirë, kërkon ndihmën e Abedinit për të organizuar mbrëmjen e vitit të ri. Gjyla, e mbërthyer nga kujtimet dhe mërzia që festat nganjëherë i sjellin, gjen ngushëllim në përpjekjet e Lules për ta bërë të qeshë dhe ta disponojë.

Lulja, e vendosur në misionin e saj, i propozon Gjylës një mbrëmje daljeje dhe argëtimi për të mirëpritur vitin e ri me stil.

Abedini, me humorin e tij karakteristik dhe gjithmonë i gatshëm për të sjellë buzëqeshje, merr rolin e Babadimrit. Me kostumin e tij të kuq dhe me një qese plot me befasi, ai synon të mbushë zemrat e të gjithëve me gëzim dhe të shpërndajë atmosferën festive.

Por kulmi i episodit vjen kur të gjithë personazhet e serialit “Me Gjylen” mblidhen në shtëpinë e Gjylës për të festuar së bashku. Të gjithë janë aty për të ndarë gëzimin dhe të mirëpriten një vit të ri të shpresave dhe të mundësive të reja.

Ndërkohë, Gjyla e vogël përjeton një moment magjik kur ndodh një befasi e veçantë. Këngëtari i dashur dhe i mirënjohur Sinan Vllasaliu, i cili historikisht ka qenë një idoll për karakterin e saj, i vjen për vizitë në kujtimet e nostalgjisë. /Telegrafi/