“Sikur të isha vaksinuar kundër COVID-19!”: Kjo është ajo për çfarë pendohet 24-vjeçari amerikan, i cili kishte nevojë për transplantim të dyfishtë të mushkërive

Një burrë 24 vjeçar nga Georgia, i cili u prek nga COVID-19 dhe kishte nevojë për një transplant të dyfishtë të mushkërive – dhe i cili mbetet i shtruar në spital – ka shprehur keqardhjen e tij që nuk u vaksinua kundër virusit, i cili deri më tani ka vrarë më shumë se 607,000 amerikanë.

Sipas mediave të huaja, përcjell Telegrafi, Blake Bargatze u kishte thënë prindërve të tij se ai po shtynte marrjen e një vaksine kundër COVID-19 sepse ai ndihej i pasigurt për efektet e saj të mundshme anësore, njoftoi WSB-TV në Atlanta.

“Ai donte të priste disa vjet për të parë, nëse ka ndonjë efekt anësor ose diçka tjetër prej saj”, tha Paul Nuclo, njerku i tij. “Megjithatë, sapo ai hyri në spital, ai tha se do të kishte dashur të kishte marrë vaksinën”.

Bargatze ishte i vetmi anëtar i familjes së tij që nuk u vaksinua, tha Cheryl Nuclo, nëna e tij, për Fox 5 Atlanta. Sapo u shtrua në spital, ai kërkoi të vaksinohej.

“Një natë para se të intubohej, ai e donte atë”, tha Nuclo. “Por që ishte pak vonë atëherë”.

Bargatze, i cili nuk kishte kushte paraprake mjekësore dhe ka duruar qëndrim të zgjatur të kujdesit intensiv në spitale në tre shtete të ndryshme gjatë tre muajve të fundit, beson se ai kontraktoi COVID-19 gjatë një vizite në prill në Florida.

Ndërkohë një faqe GoFundMe e krijuar nga miqtë e Bargatze po mbledh para për të ndihmuar në mbulimin e faturave të tij mjekësore.

Kështu, nëna e Bargatze tha se djali i saj dëshiron që skeptikët e vaksinave të mësojnë nga ato që i ndodhën atij dhe të vaksinohen për COVID-19. /Telegrafi/