Si arriti Tottenhami ta rrëmbente Conten nga duart e Unitedit

Antonio Conte pritet të bëhet trajner i Tottenham Hotspur, përkundër se ishte pranë që të merrte drejtimin e Manchester Unitedit.

Strategu italian ka punuar me Fabio Paratici (drejtorin e Spursave) te Juventusi gjatë viteve 2011-2014 duke fituar tre tituj të Serie A dhe një Superkupë të Italisë.

Pas largimit nga Interi, pritej që 52-vjeçari të bëjë një pauzë, mirëpo ai ka arritur marrëveshje për ta marrë drejtimin e klubit nga Londra e Veriut, edhe pse ishte në negociata me Djajtë e Kuq.

Edhe pse ishte në bisedime me Conten, Unitedi vendosi gjatë tetorit që të mos e shkarkonte Ole Gunnar Solskjaerin, por t’i jepte kohë deri në periudhën e ndeshjeve të përfaqësueseve gjatë nëntorit.

Tottenham are preparing contracts and paperworks to appoint Antonio Conte as new manager. Agreement set to be signed until June 2023 once all details will be fixed. ⚪️🤝 #THFC

Antonio Conte is currently in London with his camp, ready to meet with Fabio Paratici. pic.twitter.com/wKFddvI99K

— Fabrizio Romano (@FabrizioRomano) November 1, 2021

Për më shumë, sipas The Sun, Djajtë e Kuq do të detyrohen t’ia paguajnë rrogën e plotë trajnerit norvegjez në rast se e shkarkojnë, prandaj vendosën që ta shtynin shkarkimin e tij.

Pikërisht skuadra e Solskjaer e mposhti Tottenhamin dhe nxiti shkarkimin e Nuno Espirito Santos duke i hapur rrugë arritjes së marrëveshjes së Spursave me Conten.

Sky Sport Italia dhe Sportitalia, raportojnë se trajneri italian tashmë ndodhet në Londër, ku pritet të nënshkruajë marrëveshje prej një viti e gjysmë me klubin anglez.

Tottenhami e kishte kontaktuar Conten qëkur u largua nga Interi, mirëpo ai e refuzoi ofertën duke thënë se nuk do të merrte një klub që nuk e bind pavarësisht parave.

Ndërsa tani, Sky Sport Italia bën të ditur se një prej arsyeve pse ka ndërruar mendje është vendimi i Spursave për të investuar në afatin kalimtar të janarit.

Conte është një trajner shumë kërkues sa u përket transferimeve dhe ai ishte larguar nga Juventusi dhe Interi pikërisht për shkak të mosmarrëveshjeve lidhur me lojtarët që i dëshironte në skuadër.

Detyra e parë e tij në postin e trajnerit të Tottenhamit pritet të jetë përballka e të enjtes kundër Vitesses në Ligën e Konferencës. /Telegrafi/