Dogana dhe Policia e Kosovës në PKK-Jarinje, në hyrje të Republikës së Kosovës, gjatë kontrollit të specializuar kanë hasur në maunën e cila po transportonte mallra për Kosovë, gjersa ngasësi i atij automjeti, qytetar i Serbisë kishte të fshehura mallra në kabinën e vozitësit.

Malli “Caffeine Anhydrous” në formë pluhuri ishte në 5 pako nga 20 kilogramë, në total 100 kilogramë që kishte origjinë nga Kina.

Në njoftimin e Doganës së Kosovës bëhet e ditur se rasti në fjalë është duke u trajtuar nga Sektorët relevant mbi destinimin dhe përdorimin final të preparatit kimik.

Ndryshe, “Caffeine Anhydrous” është një formë e përpunuar e kafeinës, që kohët e fundit është bërë i njohur për humbje peshe dhe përmirësim të performancës atletike.

Dogana e Kosovës dhe Policia po ashtu ka hasur në maunën që ngasësi, qytetar i Serbisë kishte të fshehura mallra në hapësirën e maunës e cila është e destinuar për vendosje të paletave.

Aty janë gjetur atlete për të rritur “Adidas Yeezy “ 25 palë dhe atlete për të rritur “New Balance 550 “ – 50 palë.

“Maunat janë dërguar nën përcjelljen e stafit doganor dhe policor në terminalin doganor në Mitrovicë për kontroll të detajuar, deri sa malli i padeklaruar apo kontrabandë është konfiskuar nga Dogana e Kosovës.

Njësit relevante të Doganës së Kosovës janë duke e trajtuar rastin si kontrabandë të mallrave, konform Kodit Doganor dhe të Akcizave. /Telegrafi/