Shtator-nëntor, periudha më e mirë për të humbur në përvojat që jua ofron Stambolli

Nga fundi i muajit shtator e pothuajse deri në fund të vitit, është sezoni i vjeshtës në Stamboll. Në këtë periudhë, jeta i rikthehet normalitetit, institucionet që janë mbyllur gjatë verës i ri-hapin dyert.

Nga fundi i shtatorit, distriktet qendrore të qytetit ri-mbushen dhe jeta e gjallë e Stambollit fillon të ri-shfaqet, transmeton Telegrafi.

Vjeshta është gjithashtu sezona ideale për ta vizituar këtë qytet mbresëlënës sepse moti është i përsosur – as nuk është shumë ngrohtë, e as nuk është shumë ftohtë.

Këtë sugjerim e mbështetë edhe një artikull nga ‘U.S News’, i cili thotë se periudhat mes marsit dhe majit, si dhe mes shtatorit dhe nëntorit janë më të përsosurat për ta vizituar këtë qytet, sepse atëherë turmat në atraksionet e qytetit janë më të menaxhueshme, çmimet e dhomave janë më të lira dhe temperaturat janë më të ulëta.

Gjatë vizitimit të Stambollit në vjeshtë, ju mund të bëni shumë gjëra – duke përfshirë vizitimin e vendeve historike dhe atraksionet kryesore të qytetit.

P.sh. pjesa e Bosforit është ndër pjesët më me sharm të qytetit, por që nuk vizitohet aq shumë nga turistët. Edhe distriktet Bebek, Arnavutkoy, Yenikoy apo Emirgan ia vlen të vizitohen.

Stambolli është vazhdimisht duke u shndërruar edhe në qytet të artit, e këtë e dëshmojnë lagjet e mbushura komplet me grafiti, siç është Karakoy – një zonë shumë e mirë qendrore e mbushur me kafene të vogla, workshop-e dhe dyqane kocneptuale.

Gjatë vizitës keni rastin ta eksploroni edhe gastronominë e Stambollit: klima e vjeshtës është e përsosur për të zbuluar disa pjata të reja turke, të cilat nuk do të kishit pasur apetit t’i provoni gjatë temperaturave të larta – siç janë qebapat apo dynerët, etj.

Përndryshe, Stambolli është edhe vend shumë kulturor, dhe me këtë nënkuptojmë se në këtë qytet edhe gjatë vjeshtës mbahen shumë festivale në të cilat ia vlen të shkoni dhe t’i shijoni.

Por, në fund, padyshim se pjesa e preferuar duhet të jetë shopping-u. Stambolli është qytet ku mund t’i gjeni dyqanet e brendeve më luksoze në botë, por mund të gjeni edhe rroba shumë të mira dhe të lira të prodhuara nga turqit.

Gjatë qëndrimit në Stamboll, ju keni mundësinë t’ua hidhni një sy dizajnerëve të ri turk që gjenden në distriktet Nisantasi dhe Bebek.

Ka edhe shumë gjëra tjera që mund t’i bëni gjatë qëndrimit tuaj – mund të humbni në muzetë e mahnitshëm të qytetit, të vizitoni hamame vendase, të tymosni ‘hookah’, etj. /Telegrafi/