Lajme Kosovë

Shtabi Emergjent në Podujevë kërkon zbatim strikt të masave të reja mbrojtëse kundër COVID-19

Para 4 vitesh

Shtabi Emergjent i Komunës së Podujevës për veprime dhe masa parandaluese e mbrojtëse nga Covid-19 ka mbajtur takim, në të cilin ka shqyrtuar gjendjen aktuale me pandeminë, respektimin e masave të reja mbrojtëse nga ky virus.

Në takimin e sotëm të Shtabit Emergjent, të udhëhequr nga kryetari i Komunës, Shpejtim Bulliqi, ku u diskutua situata e rënduar epidemiologjike në komunën e Podujevës, dhe masat e reja të Qeverisë së Repuplikës së Kosovës për parandalimin e Covid-19.

Bulliqi, diskutoi rreth rritjes së numrit të infektuarëve dhe numrit të rasteve me vdekje, ku bëri thirrje tek të gjitha njësitë e atakuara me covid të jenë në nivelin më të lartë të punës. Kryetari Bulliqi theksoi që për tejkalim të kësaj situate fokusi dhe funksionimi i mirëfilltë të jetë në Qendrën Anti-Covid, në shërbimin e mirë Paliativ dhe funksionimin e Qendrës së Vaksinimit.

Tutje tha se situata është emergjente, por është ende e menaxhushme, gjithashtu ai ofroi edhe mbështetjen institucionale në çdo kohë rreth menaxhimit sa më të mirë të pandemisë.

Epidemiologia Bedrie Rama tha se më datën 26 korrik nuk kemi patur asnjë rast aktivë ne komunën e Podujevës, prej datës 27 korrik filluan rastet aktive, e ku dy javët e fundit është rritur numri dukshëm, vetëm gjatë dy javëve të fundit kemi 669 raste aktive, ndërsa numri total i rasteve aktive është 897 persona, të shëruar 5133 dhe raste që përfunduan me fatalitet 65 (eksitus).

Sa i përket Qendrës së Vaksinimit epidemiologia Rama tha se procesi i vaksinimit po shkon mirë, ka numër shumë të interesuar të qytetarëve për vaksinim, gjithsej janë 11 ekipe. Numri i të vaksinuarve është deri tani 36.909 në komunën e Podujevës.

Komandanti i Stacionit të Policisë, Major Nijazi Jashari, theksoi kalimin e orarit të punës tani në 12-orësh me vendim të Qeverisë së Repulikës së Kosovës, gjë e cila ndihmon në procesin e mbarëvajtjes së menaxhimit të pandemisë.

Jashari tha se policia është duke zbatuar planin operativ për zbatimin e masave mbrojtëse kundër COVID-19, ku vetëm gjatë muajit gusht janë lëshuar 559 tiketa për qytetarët të cilët nuk kanë respektuar masat anti covid, dhe janë gjobitur rreth 13 lokale për mosrespektim të masave.

Drejtori i Drejtorisë së Shëndetsisë dhe Mirëqenie Sociale, Driton Veliu shprehu shqetësimin për rritjen e numrit të rasteve me COVID-19 dhe kërkoi angazhimin të përbashkët për luftën ndaj variantit mjaft të rrezikshëm Delta. Drejtori Veliu në koordinim me komandantin e policisë u dakorduan për më shumë kontrolla sporadike te personat të cilët janë pozitiv me Covid-19, me qëllim të parandalimit të infeksionit nga daljet e tyre.

Shtabi Emergjent u bënë apel qytetarëve të vaksinohen dhe të respektojnë në përpikëmëri masat e reja në mënyrë që të dalim nga kjo situatë e rënduar epidemiologjike, sepse vetëm duke respektuar masat anti-covid do të ruajmë vetën dhe familjet tona.