Shqipëria drejtë zgjedhjeve të pjesshme lokale më 6 mars, përshpejtohet dhënia e letërnjoftimeve

Ministria e Brendshme është shprehur sot se në bashkëpunim me kompaninë e prodhimit të dokumenteve biometrike “Aleat” kanë rënë dakord që të përshpejtojnë lëshimin e letërnjoftimeve për qytetarët që kanë aplikuar, në mënyrë që të garantojnë pjesëmarrjen e tyre në zgjedhjet e pjesshme lokale më 6 mars.

Shqipëria pritet të mbaj zgjedhje të pjesshme lokale në 6 bashki të vendit – Shkodër, Dibër, Durrës, Rrogozhinë, Vorë dhe Lushnjë.

Lëshimi i përshpejtuar i letërnjoftimeve është i vlefshëm vetëm në njësitë vendore ku do të mbahen zgjedhjet, ka theksuar ministria.

Forcat kryesore që marrin pjesë në zgjedhje përmes kandidatëve të tyre janë Partia Socialiste, Partia Demokratike dhe koalicioni “Shtëpia e Lirisë” i përbërë nga grupimi i Sali Berishës, Lëvizja Socialiste për Integrim dhe Partia Demokristiane.

Sipas njoftimit të Ministrisë së Brendshme, për aplikimet në 6 qytetet ku do të mbahen zgjedhje, letërnjoftimi do të jenë gati deri ditën e shtunë, e mund të tërhiqen pranë zyrave të “Aleat”, që do të qëndrojnë të hapura. /Telegrafi/