Dhjetëra emigrantë shqiptarë do të kalojnë sot natën në Pikën Kufitare të Kapshticës të kufizuar nga rregulli i Greqisë për të kaluar vetëm 300 qytetarë në ditë nga ky kalim.

Emigrantët shprehen të indinjuar për kushtet ku ndodhen, pasi nuk kanë të paguajnë as hotel dhe duhet ta kalojnë natën mes të ftohtit të Kapshticës, dhe ankthit nëse nesër do të jetë radha e tyre për të kaluar apo jo, pasi shumica prej tyre u skadon dhe tamponi.

Njëra prej emigranteve është e sëmurë me tension dhe zemër, teksa ankohet dhe prej mushkonjat. Ajo zbulon se u është premtuar se nesër do të kalojnë në orën 6 të mëngjesit.

”Mua më ka shkuar tensioni 20- 107 i zemrës, jam e sëmurë. A do përballoj natën? Nuk e di. Na lanë gjithë natën këtu. Na çanë mushkonjat. S’dimë çfarë do bëjmë. Jemi në hall. Shumë i vështirë qëndrimi këtu, është ftohtë, të sëmurë jemi, në moshë. Me ç’lekë të shkojmë në hotel? Përse e bëmë aplikimin, se s’kishim lekë. Të tjerët që kishin e bënë. Nesër na skadon afati i tamponit, në drekë ora 11. Na thanë që në 6 do kaloni. Do kalojmë s’do kalojmë s’di gjë.”- tha emigrantja për ballkanweb.

Një tjetër emigrant shprehet se nuk dihet tashmë nëse do kalojnë apo jo nesër pasi në mëngjes u skadon dhe tamponi. Ai ankohet për kushtet e të ftohtit ku ndodhet, por nuk ka të paguajë hotelin. Për më tepër ai thekson se nuk ka shtet shqiptar prandaj Greqia vendos këto kushte.

”Ne vendosëm do qëndrojmë gjithë natën. I kaluam 14 orë. Do kalojmë, s’do kalojmë e di dogana greke. I bëmë prap aplikimet. Për tamponin nuk e dimë, nesër na skadon nëse quhet nga momenti i bërjes së testit. Do e kalojmë natën në autobus, si gjithë të tjerët. 10 minuta nuk rri dot këtu. Nata është e ftohtë, Bilishti është i ftohtë natën. Me Greqinë s’haemi dot se s’ka shtet.”- tha emigranti.

Një emigrante tjetër shqiptare thotë se prej 25 vitesh vijojnë radhët dhe ndalesat në këto dogana dhe emigrantët tashmë prej dekadash torturohen mes Shqipërisë dhe Greqisë.

”Nga e keqja do durojmë, siç kemi duruar 25 vite. Do presim nesër në mëngjes, na thanë në 6 do ikni se është autobusi i parë. është ftohtë këtu dhe do futemi brenda. As nuk do t’ia dijë njeri. Të gjithë autobusi janë këtu. ”- tha emigrantja.