Shpallet aktgjykimi për vrasjen e trefishtë në Gjakovë

Gjykata Themelore në Gjakovë ka shpallur sot aktgjykimin në çështjen penale kundër të akuzuarve Qëndrim Shala dhe Veton Gjoshi, të cilët akuzohen për veprat penale të vrasjes në bashkëkryerje dhe mbajtje të paautorizuar të armëve.

Më 23 gusht 2016, rreth orës 16:40, në kryqëzimin e rrugës “Sylejman Hadum Aga” dhe “Shefki Shasivari”, saktësisht në lokalin “Deep bar”, ishin privuar nga jeta Zef Krasniqi, Valon Islamaj dhe Ali Islamaj.

Sipas Prokurorisë, kjo vrasje e trefishtë, e cila kishte ndodhur në “Çarshinë e Vjetër”, në Gjakovë, ishte motivuar nga hakmarrja.

Të dyshuarit kishin qëlluar me dy armë nga vetura e tyre “Skoda” me ngjyrë të zezë dhe të njëjtit ishin dorëzuar pas 6 muajsh në Polici.

Të akuzuarin e parë, Qëndrim Shala, trupi gjykues i kryesuar nga Shaqir Zika e shpalli fajtor për veprën penale të vrasjes si bashkëkryes dhe e dënoi me burg në kohëzgjatje prej 12 vjetësh, ndërsa për veprën penale  të mbajtjes në pronësi, posedim dhe kontroll të paautorizuar të armëve dënim me burgim prej 1 viti, raporton Kallxo.com.

Prandaj, Gjykata Qëndrim Shalën e ka dënuar me dënim unik në kohëzgjatje prej 12 vjet e gjashtë muaj, në të cilin dënim do t’i llogaritet koha e kaluar në paraburgim nga data 27 janar 2017.

Masa e paraburgimit do të zgjasë deri në plotfuqishmërinë e këtij aktgjykimi por jo më tepër se dënimi i shqiptuar..

Ndërsa, i akuzuari i dytë, Veton Gjoshi, u shpall fajtor për veprën penale të vrasjes si bashkëkryes dhe u dënuar me burg në kohëzgjatje prej 11 vjetësh, ndërsa për veprën penale të mbajtjes në pronësi, posedim dhe kontroll të paautorizuar të armëve me burgim prej 1 viti.