Shkëlqeu ndaj Marseilles, Strakosha: Të gjithë meritojmë të luajmë

Lazio dhe Marseille kanë luajtur baras 0-0 në kryendeshjen e mbrëmshme në garën e dytë më të madhe evropiane për klube, Ligën e Evropës.

Lojtari me notën më të lartë në këtë ndeshje është shpallur portieri shqiptar Thomas Strakosha.

Gardiani i Lazios bëri disa pritje fantastike në këtë sfidë, duke shpëtuar skuadrën e tij nga humbja nga Marseille.

Pas ndeshjes Strakosha ka folur për takimin duke thënë se Lazio meritoi ta fitonte ndeshjen.

“Në pjesën e dytë ne merituam të fitonim. Pau Lopez bëri një paraqitje fantastike. Edhe mbrojtja e Marseille nuk u dorëzua kurrë, prandaj ne e patëm të vështirë të shënonim. Megjithatë, duhet ta shikojmë gotën gjysmë të mbushur. Ne kemi kohë dhe rezultatet do të vijnë”, tha Strakosha.

Tutje portieri shqiptar foli edhe për lojtarët që nuk po luajnë shumë, përfshirë edhe vetën duke thënë se të gjithë meritojnë rastin.

“Cataldi ishte një nga më të mirët. Ai meriton gjithçka për atë që jep në fushë. Ndihmon ekipin të bëjë më mirë, edhe kundër Interit ndodhi kështu”.

“Gjithsesi, të gjithë lojtarët janë të rëndësishëm për ekipin. Të gjithë e meritojnë të luajnë. Kam dhjetë vite te Lazio dhe kam parë se kushdo që futet në fushë jep gjithçka për të ndihmuar ekipin”, u shpreh Strakosha. /Telegrafi/