Vdekja e një punëtori nga shembja e dheut në Veternik, flet prokurori i rastit

Blerim Igrishta, është prokurori që po heton rastin e vdekjes së një punëtori dhe lëndimin e një tjetri, gjatë punës në ndërtimin e një objekti në lagjen Veternik të Prishtinës, pas shembjes së dheut.

Në një intervistë për emisionin “Kallxo Përnime”, Igrishta ka deklaruar se aktualisht është një person i dyshuar dhe i arrestuar, ndërsa po zhvillohen hetime edhe për kompaninë që po kryen punimet.

Sipas prokurorit, i arrestuari është person përgjegjës për sigurinë e punëtorëve.

“Më datën 05.04.2025 jemi njoftuar nga Policia se në lagjen Veternik është një aksident në një vendpune, ku është shembë një pjesë e dheut dhe u dyshojke që janë lëndu dy persona. Për fat të keq, informata ka dalë e saktë dhe kemi dalë në vendngjarje, edhe prokurori i krimeve të rënda, derisa jam njoftu edhe unë dhe kam dalë në vendngjarje. Kur kemi shku aty kemi parë se ka qenë një person pjesërisht i mbuluar nga dheu, dhe i njëjti ka pasur lëndime në këmbë, ndërsa personi tjetër, i cili edhe ka vdekur, ka qenë i mbuluar tërësisht. Jam marrë veprimet e nevojshme, e kemi nxjerrë viktimën, dhe personin e lënduar e kemi dërguar në spital” – deklaroi ai në emisionin e transmetuar më 13.04.2025.

Prokurori tha se hetimet kanë filluar për vepren penale “Asgjësimi apo heqja e pajisjeve mbrojtëse dhe rrezikimi i sigurisë në vendin e punës”.

“Filllimisht është arrestu një person, i cili në bazë të dokumentacioneve deri tash, për të cilin është bërë kërkesë për shqiptimin e masës së paraburgimit. Ai është personi përgjegjës për sigurinë e punëtorëve në punë. Që nënkupton, se hetimet kanë fillu për veprën penale “heqja e pajisjeve të sigurisë” e po ashtu, është hetu edhe për firmën që i ka kryer punimet dhe jemi në grumbullim të provave dhe të informacioneve. Deri më tani është një person i dyshuar dhe i arrestuar, ndërsa po hetohet edhe personi juridik, firma që ka qenë duke i kryer punimet” – deklaroi ai.

Sipas Igrishtës, dyshimet janë në vendngjarje nuk është bërë sigurimi i vendit të punës dhe mungesa e pajisjeve.

“Ne fillimisht dyshojmë se nuk është bërë sigurimi i vendit të punës, dhe kanë mungu pajisjet e duhura për kryerjen e punëve. Por nuk mundemi me dalë me një konstatim të tillë sepse jemi duke pritur mendimin e ekspertit të punës, të inxhinierëve dhe gjithë personave përgjegjës për kryerjen e atyre punimeve” – tha ai.

Por se a është duke punuar diçka Prokuroria në parandalimin e këtij rasteve, Igrishta tha se me vendim të kryeprokurorit është caktuar një prokuror koordinator që raporton çdo muaj për veprimet në rastet e tilla.

“Është e vërtetë që rastet e tilla kanë fillu të jenë më të shpeshta për shkak edhe të punimeve që po bëhen në qytet. Por Prokuroria Themelore e Prishtinës e ka marrë prioritet që në vitin 2025, të merret shumë më seriozisht me rastet e tilla dhe për çka edhe me urdhër të kryeprokurorit është caktuar një prokuror koordinator i cili do të mirët vetëm me rastet e tilla dhe në baza mujore do të raportoj të kryeprokurori për veprimet e ndërmarra në këto raste. E ku parashihet të thellohet bashkëpunimi edhe me inspektorat dhe organet tjera kompetente dhe raste e tilla të parandalohen, sepse është një dukuri, bukur e shpeshtë e që për shumicën e rasteve po kemi edhe humbje të jetave të njerëzve” – u shpreh Igrishta.

Të dyja kompanitë që janë investitorë në këto vendpunishte nuk kanë pranuar të deklarohen përmes telefonit. E as nga Komuna e Prishtinës nuk pranuan që të deklarohen.