SHBA ka të ngjarë të dërgojë “ATACMS” në Ukrainë për herë të parë – pse janë kaq të rëndësishme ato?

Administrata e Joe Biden ka të ngjarë t’i dërgojë Ukrainës, Sistemet Raketore Taktike të Ushtrisë me rreze të gjatë, ose ATACMS, për të ndihmuar në luftën e saj për të zmbrapsur pushtimin rus në territorin e saj, sipas zyrtarëve amerikanë.

“Ato po vijnë”, ka thënë një zyrtar që kishte qasje në planet e ndihmës për sigurinë, shkruajnë mediat e huaja, përcjell Telegrafi.

Zyrtari vuri në dukje se, si gjithmonë, plane të tilla mund të ndryshojnë derisa të shpallen zyrtarisht.

Një zyrtar i dytë tha se raketat janë “në tryezë” dhe ka të ngjarë të përfshihen në një paketë të ardhshme të ndihmës për sigurinë, duke shtuar se një vendim përfundimtar nuk është marrë.

Mund të kalojnë muaj para se Ukraina të marrë raketat, sipas zyrtarit, shkruan abcnews.go.com.

Lexo po ashtu “Ku e shihni veten pas pesë vitesh?”: Publikohen disa pamje të vitit 2018, tregojnë se sa shumë ka ndryshuar Zelensky gjatë luftës në Ukrainë

Por i pyetur për këtë çështje, zëdhënësi i Shtëpisë së Bardhë John Kirby tha se një vendim nuk është marrë.

“Nuk ka asnjë vendim për ATACMS tani”, ka thënë Kirby gjatë intervistës, në Nju Delhi, Indi. “Siç ka thënë presidenti, ato nuk janë jashtë tryezës”, shtoi Kirby.

Me një distancë deri në 300 kilometrash, në varësi të versionit, vendosja e ATACMS mund t’i lejojë Ukrainës të arrijë objektivat gati katër herë më larg sesa me raketat e ofruara aktualisht për Sistemet e saj të Raketave të Artilerisë.

Administrata deri më tani ka refuzuar kërkesat e presidentit ukrainas Volodymyr Zelensky për këto armë, edhe pasi Mbretëria e Bashkuar dhe Franca kanë dërguar raketa të krahasueshme Storm Shadow, për shkak të shqetësimeve si për përshkallëzimin me Rusinë, ashtu edhe për ruajtjen e rezervave të vetë Amerikës. /Telegrafi/