SHBA-ja nis zbatimin e tarifës prej 10 për qind, vlen edhe për Kosovën

Doganat e Shteteve të Bashkuara kanë filluar të zbatojnë një tarifë prej 10 për qind për të gjitha importet nga një numër shtetesh, përfshirë Kosovën, në përputhje me urdhrin e presidentit Donald Trump.

Ndërkohë, tarifat më të larta për mallrat që vijnë nga 57 shtetet më të mëdha tregtare të SHBA-së do të fillojnë të aplikohen javën e ardhshme.

Vendimi për tarifën bazë prej 10 për qind u implementua në portet detare, aeroportet dhe magazinat doganore të SHBA-së duke filluar nga ora 12:01 të mëngjesit (06:00 sipas kohës lokale në Kosovë) më 2 prill.

Lexo po ashtu Trump shpall tarifat e reja: Kosovës dhe Shqipërisë 10 për qind, Serbisë 37 për qind

Kosova është ndër vendet që është përfshirë nga kjo tarifë, e cila do të ndikojë në importet nga SHBA. Përfaqësues të odave ekonomike kanë shprehur shqetësimin se kjo tarifë do të ketë pasoja të mëdha për eksportuesit kosovarë, duke i kërkuar Qeverisë së Kosovës të heqë tarifën 10 për qind për mallrat nga SHBA dhe të mbështesë bizneset vendase të prekura nga ky vendim, shkruan reuters.

Kelly Ann Shaw, një avokate tregtare dhe ish-këshilltare e Shtëpisë së Bardhë, e përshkroi këtë masë si një nga veprimet tregtare më të mëdha në historinë e SHBA-së. Ajo theksoi se, megjithëse tarifat mund të evoluojnë me kalimin e kohës, ky ndryshim është një hap i rëndësishëm që do të ndikoje në mënyrën se si SHBA-ja ka zhvilluar marrëdhëniet tregtare me të tjerët.

View this post on Instagram

A post shared by Telegrafi.com (@telegrafi)

Vendimi i Trumpit për të vendosur tarifa ndaj importeve nga të gjitha shtetet e botës më 2 prill shkaktoi një luhatje të madhe në tregjet globale të aksioneve.

Po ashtu, tarifat më të larta reciproke të Trumpit do të hyjnë në fuqi të mërkurën, me nivele që variojnë nga 11 deri në 50 për qind. Importet nga Bashkimi Evropian do të ndeshen me një tarifë prej 20 për qind, ndërsa ato nga Kina do të goditen me një tarifë prej 34 për qind, që do të çojë tarifën totale për Kinën në 54 për qind.

Lexo po ashtu Tarifat e Trumpit kanë tronditur tregjet - sa duhet të shqetësohemi?

Kanadaja dhe Meksika janë përjashtuar nga këto tarifa të reja, pasi ato janë ende subjekt i një tarife prej 25 për qind lidhur me krizën e fentanilit në SHBA.

Gjithashtu, Trump ka përjashtuar nga tarifat e reja produktet që janë nën masat e sigurisë kombëtare, duke përfshirë çelikun dhe aluminin, makinat, kamionët dhe pjesët e automjeteve.

Administrata amerikane ka publikuar një listë me më shumë se 1,000 produkte të cilat janë të përjashtuara nga tarifat e reja, përfshirë naftën e papërpunuar, produktet e naftës, barnat farmaceutike, uraniumin, titanin, lëndët drusore, gjysmëpërçuesit dhe bakrin. /Telegrafi/