Serie A – Kandidatët kryesorë

Kampionati italian po fillon dhe me të njëkohësisht fillon edhe numërimi mbrapsht i asaj që quhet gara për shkatërrimin apo mbijetesën e Interit në fronin e futbollit italian.

Transferimi i Ibrahimovic te Milani dhe përforcimet e rivalëve të Interit, i cili ka humbur pikën më të fortë, trajnerin Jose Mourinho, do ta bëjë edhe më të hapur garën për Skudeto.

Serie A pritet të jetë më interesante se kurrë, me skuadrat tradicionale si Juventus e Milan që janë përforcuar në masë të konsiderueshme dhe të cilat definitivisht pritet t’i bëjnë konkurrencë një Interi të moshuar, i cili pothuajse nuk ka ndryshuar fare gjatë këtij afati kalimtar veror.

Inter

Trajner: Rafa Benitez
Yjet: Sneijder dhe Milito
Sezonin e kaluar: Kampionë
Pritjet për këtë sezon: Scudetto
Blerjet: Biabiany, Castellazi, Coutinho, Faraoni, Serrano.
Të larguarit: Arnautovic, Donati, Quaresma, Toldo, Krhin, Balotelli

Pa kurrfarë dyshimi, Interi është favorit për ta fituar titullin e gjashtë me radhë në Serie A. Pas largimit të Jose Mourinhos, në krye ka ardhur një emër tjetër i spikatur, Rafa Benitez, i cili do të ketë për detyrë mbrojtjen e tripletës. Interi posedon njërën prej skuadrave më të forta në botë me Wesley Sneijder, Samuel, Eto’o, Maicon dhe të palodhshmin Javier Zanetti. Vetëm koha do të tregojë nëse Moratti ka gabuar që nuk ka sjellë lojtarë tjerë, përderisa ka larguar talentë të jashtëzakonshëm si Quaresma dhe Balotelli.

Milan

Trajner: Massimiliano Allegri
Yjet: Ronaldinho dhe Ibrahimovic
Sezonin e kaluar: Pozita e 3-të
Pritjet për këtë sezon: Kualifikim në Ligën e Kampionëve, Scudetto.
Blerjet: Amelia, Diniz, Legati, Yepes, Papastathopoulos, Boateng, Ibrahimovic.
Të larguarit: Darmian, Favalli, Storari, Strasser, Zigoni, Oduamadi.

Rossonerët nuk dinë për trofe që prej më se tri vitesh dhe nuk e kanë parë me sy Scudetton që nga viti 2004. Natyrisht, kështu është kur një skuadër me traditë e shndërron në shtëpi të të moshuarve. Sidoqoftë, ka ardhur koha për revolucionin. Më në fund Berlusconi ka vendosur t’i japë një goditje Interit, duke sjellë njërin prej sulmuesve më të kompletuar në Evropë, Zlatan Ibrahimovic. Të gjithë jemi kuriozë të shohim Ibrën në sulmin Rossoner, me në krah Ronaldinhon, asistuesin më të mirë në botë. Megjithatë, gjithçka duhet marrë me rezerva! Milani ende ka një mesfushë të moshuar dhe mbase ‘të ndryshkur’ e cila duhet riparuar. Një gjë dihet – këtë sezon vështirë se kuqezinjtë do të deklasohen me rezultat të thellë nga fqinjët e tyre ‘të dashur’, Nerazzurët.

Juventus

Trajner: Luigi Del Neri
Sezonin e kaluar: Pozita e 7-të
Pritjet për këtë sezon: Scudetto
Yjet: Chiellini dhe Buffon
Blerjet: Bonucci, Lanzafame, Martinez, Motta, Pepe, Storari, Krasic, Aquilani, Quagliarella.
Të larguarit: Almiron, Cannavaro, Chimenti, Caceres, Immobile, Marrone, Molinaro, Yago, Giovinco, Poulsen, Edkdal, Diego.

Juventusi përjetoi një nga sezonet më të këqija në histori të klubit vitin e kaluar. Skuadra, e cila ka bërë më së shumti lëvizje në merkato gjatë kësaj vere, merr epitetin e kandidatit për titull, por pa harruar se i mungon kualiteti në sulm. Ende Bianconerët varen nga klasi i Del Pieros, por sa gjatë, kjo mbetet të shihet. Juventusi do të jetë bartësi i parë i koalicionit Anti-Inter, pasi ka ndjekur një politikë të ‘italianizimit’ të klubit. Me transferimet e Krasic dhe Aquilanit, Juventusi automatikisht përfiton ekuilibra në mesfushë, ekuilibra të cilat nuk i ka pasur që nga koha e largimit të legjendës së klubit, Pavel Nedved.

Roma

Trajneri: Claudio Ranieri
Yjet: Totti dhe De Rossi
Sezonin e kaluar: Nënkampion
Pritjet për këtë sezon: Scudetto
Blerjet: Adriano, Barusso, Cicinho, Loria, Rosi, Simplicio, Guillermo Burdisso, Nicolas Burdisso.
Të larguarit: Motta, Toni.

Roma sezonin e kaluar e ka pasur Scudetton në këmbë, por ishte Giampaolo Pazzini ai që me dy golat e tij ndaj Giallorosëve ia dha Scudetton Interit. Ai triumf do ishte historik për Romën, por çfarë tani? E kaluara mbetet e kaluar dhe tani romakët do të tentojnë që me anë të legjendarit Adriano, kësaj radhe një herë e mirë të përfundojnë sezonin në pozitën e parë. Roma është skuadër e shëndetshme në përbërje dhe ende me plot të drejtë mban epitetin e skuadrës që luan futbollin më të bukur në Itali.

Kush nga kjo katërshe është pretendues kryesor për titull në Serie A këtë sezon? A do të arrijnë që Roma, Juventusi dhe Milani ta ndalojnë Interin? A mund të befasojë ndonjë skuadër tjetër duke thyer katërshen më të mirë, ose madje edhe duke luftuar për titull? Shprehuni në hapësirën për komente…

/Telegrafi/