Serbia po e shkel marrëveshjen për normalizim, Vuçiq u shkruan liderëve evropianë kundër anëtarësimit të Kosovës në KiE

Serbia po vazhdon të lobojë në të gjitha format kundër shtetit të Kosovës, saktësisht kundër anëtarësimit të Kosovës në organizata ndërkombëtare, ndonëse një gjë e tillë ndalohet me marrëveshjen për normalizim të raporteve.

Ministri i Financave i Serbisë, Sinisha Mali ka thënë se presidenti serb, Aleksandar Vuçiq u ka dërguar letra të gjithë liderëve në Evropë lidhur me procesin e anëtarësimit të Kosovës në Këshillin e Evropës.

“Sfida e parë për ne është pikërisht Këshilli i Evropës dhe lufta që na pret”, tha Mali për televizionin Happy, duke shtuar se Serbia do të bëjë gjithçka që kjo të mos ndodhë, shkruan nova.rs.

Lexo po ashtu BE nuk komenton paralajmërimet e Serbisë për të penguar Kosovën drejt Këshillit të Evropës

Ndryshe, me një letër të tillë, Serbia po shkel edhe marrëveshjen për normalizim të raporteve mes dyja vendeve, e cila ishte arritur vitin e kaluar.

Kujtojmë se Vuçiq po ashtu ditë parë kishte deklaruar se ka krijuar një ekip që do të luftojë iniciativën që Kosova të anëtarësohet në Këshillin e Evropës.

Ndryshe, Komiteti për Politikë dhe Demokraci i Këshillit të Evropës ka miratuar raportin e raportueses për Kosovën, Dora Bakoyannis, ku rekomandohet që Kosova ka përmbushur kushtet për t’u bërë anëtare e plotë e Këshillit të Evropës.

Lexo po ashtu Vuçiq përpiqet të parandalojë anëtarësimin e Kosovës në KiE, Kaerns: BE me qasje të pabalancuar ndaj Serbisë

Pas këtij votimi në Strasburg, çështja procedohet në Asamblenë Parlamentare.

Kosova ka aplikuar në majin e vitit 2022 për anëtarësim në Këshillin e Evropës. /Telegrafi/