Sekretari i Jashtëm Britanik: Disa vende po përdorin vaksinat si një mjet gjeopolitik

Sekretari i Jashtëm i Mbretërisë së Bashkuar, Dominic Raab tha në një intervistë me reuters se vendi i tij nuk i mbështet parimet e “diplomacisë së vaksinimit”, e cila është gjithnjë e më e pranishme në botë.

Raab foli për reuters në lidhje me problemet aktuale me të cilat po përballet bota kur bëhet fjalë për vaksinimin e popullsisë. I pyetur nëse mendonte se Rusia dhe Kina po përdornin vaksina të prodhuara në vend për të ndikuar në pjesë të tjera të botës, Raab tha se kështu ishte.

“Nuk ka dyshim se disa vende përdorin vaksina për qëllime gjeopolitike. Sidoqoftë, Mbretëria e Bashkuar nuk e mbështet një qasje të tillë, as “diplomacia e vaksinimit” dhe shantazhet”, tha Raab.

Ai gjithashtu theksoi se Mbretëria e Bashkuar dhe vendet e tjera duhet të kenë një përgjegjësi për të vaksinuar banorët dhe se ky proces nuk duhet të kthehet në një luftë diplomatike.

“Ne besojmë se kemi një detyrë morale, por gjithashtu një interes të fortë për të vaksinuar popullsinë e botës. Sidoqoftë, është një përpjekje ekipore. Ne duam të bashkojmë vende si Kina dhe Rusia për të trajtuar problemet e pandemive dhe ndryshimit të klimës së bashku”, tha sekretari i jashtëm britanik.

Gjatë takimit të G7, kryeministri britanik, Boris Johnson tha se pret që vendet më të pasura të dhurojnë një miliard doza të vaksinave të koronavirusit në vendet e varfra, gjë që do të përshpejtonte procesin e vaksinimit. Shtetet e Bashkuara kanë premtuar të dhurojnë 500 milionë doza të vaksinave Pfizer për vendet më pak të zhvilluara. /Telegrafi/