Seanca e përbashkët, Spiropali: Kosova është prioritet kombëtar i Shqipërisë

Sot po mbahet seanca e përbashkët e Kuvendit të Kosovës dhe e Kuvendit të Shqipërisë. Seanca nisi me himnet e Kosovës dhe Shqipërisë.

Pas fjalës së Kryetarit të Kuvendit të Kosovës, Glauk Konjufca, ishte radha e kryetares së Kuvendit të Shqipërisë Elisa Spiropali për të dhënë fjalimin e radhës.

“Me origjinë jam nga Bregu i Labërisë, kam lindur ne Tiranë por me shtëpi zemre jam nga Prishtina e Prizreni! Jemi një gjak e një gjuhë, një histori e kulturë,” tha Spiropali.

“Kënaqësi e pafund për këtë mbledhje mes dy Kuvendeve, por ka një problem, duhet të ishim më tepër. Me qindra mijëra e jemi pak. Duhet të takohemi të gjithë aq shqiptar sa ka bota. Nuk prish punë se nuk na nxë kjo sallë, na nxënë pllajat e fushat. Për të realizuar hiperbashkimin duhet të presim. Kur nuk kemi pulën hamë një shpend tjetër thotë populli, por edhe ky shpend qenka i shijshëm sot,” tha ajo.

“Në këtë moment historik si kurrë më parë shqiptarët kanë treguar vendosmëri në zhvillimin e shoqërisë. Vetëm 1 çerek shekulli ka mjaftuar të tregojmë c çfarë energjie sjell liria,” tha Spiropali.

“Sot po ngremë në një nivel tjetër atë që etërit tanë e bënë me shumë mund e sakrifica. Kosova është prioritet kombëtar i Shqipërisë dhe e anasjelltas. Suksesi i njërës, kusht për tjetrën. Ritmi i njërës kushtëzon edhe tjetrën,” shtoi kryetarja e kuvendit të Shqipërisë.

“Emocion i thellë dhe kënaqësi e pafund sot në këtë mbledhje të përbashkët mes dy Kuvendeve tona. Por ka një problem ne që po takohemi jemi pak, duhet të ishim më tepër, duhet të ishim me mijëra, me qindra mijëra, e prapë pak janë. Duhet të takohemi të gjithë aq sa jemi, aq sa shqiptarë ka bota, me miliona. Aq shqiptarë sa ka bota nuk prishin punë, përkundrazi, nuk prish punë se s’na nxë kjo sallë, ka salla të tjera që na nxënë, janë fushat, pllajat, luginat, ku mund të takohemi, të çmallemi dhe të mirëkuptohemi me njëri-tjetrin. Përmetari ta takojë dhe ta përqafojë prishtinaliun, gjakovari labin, pejanin, mitrovicaliu vlonjatin, e kështu me radhë, derisa toka të dridhet nën këmbët tona, deri sa Zoti të habitet, deri sa Adem Jashari të lëvizë në varr, deri sa bota ta mësojë cilët jemi e çfarë mundemi të bëjmë kur jemi bashkë”, tha Spiropali.

“Halli është se për të arritur deri tek supertakimi, për të realizuar hiperbashkimin duket herët, duhet të presim. Kur s’ke pulën duhet të hash shpend tjetër thotë populli, po doni ju që edhe ky shpend qenka fort i shijshëm në këtë takim”, u shpreh Spiropali.

“Jo rrallë Ballkani ka qenë truall i ankesës dhe popujt e Ballkanit e kanë traditë të hershme që t’i projektojnë dramat dhe pakënaqësitë diku gjetkë si për të gjetur ngushëllim për brengat që historia ka prodhuar pa fund në këtë pjesë të Evropës”, theksoi ajo.

“Ne shqiptarët nuk bëjmë dallim, por askush nuk mund ta mohojë se në këtë moment historik ku kemi mbërritur si kurrë ndonjëherë më parë, shqiptarët kanë dëshmuar vendosmëri të palëkundur në rrugëtimin e tyre për shndërrimin e shoqërisë së vetë, në një shoqëri moderne, evropiane në thelb dhe në sjellje, euroatlantike në orientim dhe të drejtë në çdo aspekt”, theksoi më tej kryetarja e Kuvendit. /Telegrafi/