Samsung paralajmëron iPadin 7-inçësh?

Një zyrtar i Samsung tha për Korea Times se Apple sipas të gjitha gjasave do të paraqes një iPad më të vogël deri në fund të vitit.

Sipas të gjitha gjasave Apple do të paraqes një iPad me diagonale prej 7.85 inç, thuhet në raportin e Korea Times i cili citon një zyrtar të paemërtuar në Samsung. Thashethemet për iPadin më të vogël janë duke qarkulluar për sa kohë tani, por Steve Jobs më herët pati refuzuar idenë për tabletët 7-inçësh, duke theksuar se pajisjet e këtilla janë shumë të vogla për tu përdorur si tablet të ndjeshëm në prekje. Prapëseprapë, pas suksesit të Kindle Fire të Amazon, supozohet se edhe Apple shqyrton futjen në tregun e tabletëve 7-inçësh.

Komentet e zyrtarit të Samsungut kanë peshë të veçantë duke pasur parasysh lidhjet e fuqishme në mes të dyja kompanive përkundër padive të shumta që kanë parashtruar. Në të vërtetë, zyrtari i Samsung thekson se afarizmi i kompanisë me Apple këtë vit do të rritet në 11 miliard dollarë. Samsung prodhon procesorin (të cilin e dizajnon Apple), ekranet LCD, çipat LTE dhe çipat e memories për pajisjet e ndryshme të Apple. Vitin e kaluar Apple nga Samsung bleu komponentë në vlerë prej 7.8 miliard dollarë. /Telegrafi/