Samir Ramizi transferohet tek skuadra e njohur zvicerane

Mesfushori nga Tërrnovci i Bujanocit, Samir Ramizi është bërë me skuadër të re në futbollin zviceran.

Ish-anëtari i Dritës dhe Drenicës në Kosovë, nga stinori i ri do të jetë pjesë e skuadrës së njohur, Neuchatel Xamax që garon në ligën e dytë zvicerane, por që është dy herë kampione e shtetit dhe ka fituar tri herë super kupën

24-vjeçari do të largohet nga skuadra e tij aktuale Wohlen, pasi ka nënshkruar për dy vite me mundësi vazhdimi edhe për një tjetër.

Lajmin e ka bërë të ditur klubi zviceran Xamax, nëpërmjet faqes së tyre duke u shprehur të lumtur që kanë nënshkruar me Ramizin, transmeton Telegrafi.

Mesfushori ofensivë u largua nga futbolli kosovar në vitin 2012, pasi shkëlqeu fillimisht te Drita, ndërsa në Zvicër është paraqitur fillimisht me Stade Nyon, pastaj ka luajtur edhe për Etoile Carauge dhe Servetten.

Në stinorin 2014/15 Ramizi ka luajtur 32 ndeshje me Wohlenin dhe ka shënuar nëntë gola, ndërsa këtë vit u lëndua rëndë dhe tashmë ka kaluar lëndimin për të qenë i gatshëm për stinorin e ri për Xamaxin ku u transferua si lojtarë i lirë. /Telegrafi/