Ky tekst mbështetet në të dhëna nga Instituti Kombëtar Amerikan për Shëndetin (NIH – Office of Dietary Supplements), Shoqata Amerikane e Zemrës (American Heart Association)
Rëndësia e magnezit është vërtetuar që shumë vite më parë, kur në Kongresin Botëror të Kardiologjisë u përfshi në udhëzimet zyrtare për trajtimin e disa sëmundjeve të zemrës, siç janë aritmitë dhe çrregullimet e ritmit kardiak.
Magnezi është një nga mineralet më të rëndësishme për organizmin e njeriut. Ai merr pjesë në mbi 300 procese biokimike jetike për trupin, përfshirë metabolizmin e kalciumit, kaliumit dhe fosforit, por është i pazëvendësueshëm edhe për përpunimin e yndyrnave, proteinave dhe karbohidrateve.
Një nga rolet më të rëndësishme të tij është stabilizimi i molekulës ATP (adenozinë trifosfat), që përfaqëson burimin bazë të energjisë për qelizat tona.
Sa magnez na nevojitet në ditë?
Ekspertët rekomandojnë që një i rritur ka nevojë për rreth 400-420 mg magnez në ditë (për burrat) dhe rreth 310-320 mg për gratë. Por ajo që shumica nuk e dinë është se nevoja për magnez rritet ndjeshëm te njerëzit që kanë nivele të larta të kolesterolit.
Sipas endokrinologëve dhe nutricionistëve, kolesteroli i lartë mund të ndikojë në përthithjen dhe përdorimin e magnezit në organizëm, ndaj është thelbësore të siguroheni që ta merrni atë në sasi të mjaftueshme përmes ushqimit, transmeton Telegrafi.
Çfarë ndodh nëse mungon magnezi?
Mungesa e magnezit lidhet me lodhje kronike, ngërçe muskulore, çrregullime të gjumit, stres të shtuar, tension të lartë të gjakut dhe probleme me ritmin e zemrës. Gjithashtu, nivelet e ulëta të magnezit mund të pengojnë trupin të kontrollojë kolesterolin dhe sheqerin në gjak, gjë që mund të përkeqësojë gjendjen shëndetësore.
10 ushqimet më të pasura me magnez
Për të ruajtur një nivel të shëndetshëm të magnezit, mjekët rekomandojnë që këto ushqime të mos mungojnë kurrë në tryezën tuaj:
1. Çokollata e zezë - 28 gramë çokollatë e zezë përmban rreth 65 mg magnez, plus antioksidantë të fuqishëm.
2. Avokado - Një avokado mesatare ka 58 mg magnez dhe është burim i mirë i yndyrnave të shëndetshme.
3. Frutat e thata - Bademet, arrat, arrat braziliane: 28 gramë përmbajnë mesatarisht 83 mg magnez.
4. Bishtajoret - Sidomos fasulja e zezë, ku një filxhan i zier ka rreth 120 mg magnez.
5. Tofu - Një porcion prej 100 gramësh përmban rreth 35 mg magnez.
6. Farat - Farat e kungullit, chia dhe liri janë ndër burimet më të pasura: vetëm 28 gramë mund të kenë deri në 158 mg magnez.
7. Drithërat integrale - Një filxhan drithëra të plota përmban rreth 86 mg magnez.
8. Peshku yndyror - Si salmoni, skumbria apo toni: 100 gramë kanë rreth 30 mg magnez, përveç yndyrnave omega-3.
9. Banania - Një banane e madhe përmban rreth 37 mg magnez, si dhe kalium të bollshëm.
10. Perimet me gjethe jeshile - Si spinaqi, kale apo lakra jeshile: një filxhan spinaq i zier ka deri në 158 mg magnez.
Këshilla praktike
Ekspertët theksojnë që është shumë më mirë të siguroni magnezin përmes ushqimit të freskët sesa suplementeve, përveç rasteve kur mjeku e rekomandon ndryshe.
Nëse keni kolesterol të lartë, përpiquni të përfshini çdo ditë ushqime të pasura me magnez, të kombinuara me një dietë të balancuar, aktivitet fizik dhe kujdes ndaj stresit. /Telegrafi/
