“Kursi i NATO-s drejt zgjerimit krijon ndarje të reja, në momentin kur botës i duhet bashkim në luftën kundër coronavirusit”. Kështu thonë nga Ministria e Punëve të Jashtme e Rusisë, me rastin e anëtarësimit të Maqedonisë së Veriut në NATO.

Sipas MPJ-së ruse, anëtarësimi i Maqedonisë së Veriut në NATO nuk sjell asnjë vlerë shtesë, as për rajonin, as për sigurinë evropiane, përcjell Telegrafi Maqedoni.

“Hap i këtillë nuk do të kontribuojë për hapat në luftën kundër kërcënimeve dhe sfidave të përbashkëta, duke përfshirë edhe luftën ndaj coronacirusit. Do të krijohen vetëm ndarje të reja”.

“Përpjekjet për ta bërë këtë akt të rëndësishëm kanë rezultuar të pasuksesshme, për shkak të përkeqësimit të situatës me Covid-19. Në gjendje të jashtëzakonshme në vend, drejtuesit e Maqedonisë së Veriut megjithatë nuk e humbën rastin të theksojnë karakterin historik të anëtarësimit në NATO, i cili garanton sigurinë dhe stabilitetin e Shkupit”, thuhet në njoftimin e MPJ-së së Rusisë.

Ata më tej shtojnë se presin që Shkupi të konfirmojë detyrat dhe obligimet nga dokumenti me Rusinë i nënshkruar në vitin 1997, si dhe me deklaratën romake të vitit 2002./Telegrafi/