Lajme Kosovë Politikë

Rritet interesimi i diasporës për të votuar, krahasuar me zgjedhjet e fundit parlamentare

Në zgjedhjet parlamentare të vitit 2021, vetëm 55 për qind e shtetasve të Kosovës në diasporë, që ishin regjistruar suksesshëm për votim nga jashtë, e kishin shfrytëzuar të drejtën e votës.

Derisa zgjedhjet e 9 shkurtit 2025 po afrohen, një vëmendje të madhe po merr diaspora dhe numri i mërgimtarëve që kanë shprehur interesim për të votuar.

Sipas të dhënave zyrtare nga Komisioni Qendror i Zgjedhjeve (KQZ), 100 mijë qytetarë janë regjistruar për të votuar nga jashtë Kosovës, derisa rreth 18 mijë aplikacione ttjera janë në shqyrtim e sipër.

Nga të dhënat preliminare, deri më tani rreth 4 mijë aplikacione janë refuzuar (dukshëm më pak refuzime se në zgjedhjet e 14 shkurtit të vitit 2021).

KQZ thotë se refuzimet ndodhën për arsye se në shumicën e rasteve aplikuesit nuk janë fotografuar duke mbajtur njëkohësisht në dorë dokumentin e identifikimit siç kërkohet me rregullore.

Krahasimi me zgjedhjet e fundit parlamentare

Në bazë të dhënave të deritanishme interesimi i qytetarëve për të votuar në zgjedhje parlamentare del të jetë më i lartë se në zgjedhjet e fundit të këtij lloji të mbajtura më 14 shkurt të vitit 2021.

Në vitin 2021 kishin aplikuar rreth 140 mijë qytetarë nga diaspora për të fituar të drejtën e votës në zgjedhje. Prej tyre vetëm 103 mijë ishin regjistruar si votues valid nga jashtë.

Megjithatë një pjesë e konsiderueshme e këtyre aplikuesve nuk kishin ushtruar këtë të drejtë duke mos votuar në zgjedhje (45%). Pra, nga 103 mijë votues të regjistruar nga jashtë vetëm 57,065 prej tyre kishin dërguar fletëvotime.

E nga këto fletëvotime, vota të vlefshme që ishin procesuar në rezultatet përfundimtare ishin 56,375.

Nga këto vota të aprovuara nga jashtë, në zgjedhjet e 14 shkurtit 2021, LVV kishte fituar 44 mijë e 252 vota (78.5%). PDK kishte marr 5 mijë e 32 vota (8.9%), LDK me 4 mijë e 294 vota (7.6%) dhe AAK me 1 mijë e 112 vota (1.9%).

Rreth 2 mijë vota apo 3.5 % të votave të diasporës ishin shpërndarë për partitë tjera.

Kujtojmë që më vonë në vitin 2021 ishin mbajtur edhe zgjedhjet lokale, por nga diaspora kishte pasur pak interesim për të votuar. Numri i votuesve nga diaspora për ato zgjedhje ishte 9 mijë e 610.

Kur dhe si do të votojë diaspora në zgjedhjet e 9 shkurtit?

Votuesit e regjistruar suksesshëm për të votuar jashtë vendit, do të mund të mund të ushtrojnë të drejtën e votës më herët se qytetarët që votojnë brenda vendit më 9 shkurt 2025.

Sipas KQZ-së, varësisht se cilën mënyrë të votimit ka përzgjedhur votuesi jashtë Kosovës, është caktuar edhe periudha e votimit.

Ligji për Zgjedhjet e Përgjithshme u ka dhënë tri mundësi shtetasve të Kosovës që jetojnë jashtë vendit për të përzgjedhur se si duan të votojnë vendit.

Në momentin e regjistrimit votuesit mund të përcaktohen individualisht për mënyrën e votimit: Të votojë fizikisht në njërën nga përfaqësitë diplomatike të Republikës së Kosovës – votimi do të zhvillohet më 8 shkurt 2025 duke dërguar fletëvotimin përmes postës në kutinë postare të KQZ-së në Kosovë (votimi bëhet 9 janar – 8 shkurt 2025); apo duke dërguar fletëvotimin përmes postës në një nga kutitë postare të hapura nga KQZ jashtë Kosovës (9 janar – 8 shkurt 2025).

KQZ ka kujtuar që një shtetas që regjistrohet për të votuar jashtë Kosovës, nuk do ta gjejë emrin e tij në listën e votuesve brenda Kosovës./Telegrafi/