Agjencia Evropiane e Barnave (EMA) ka paralajmëruar se ilaçet për trajtimin e diabetit dhe humbjes së peshës që përmbajnë semaglutidë, përfshirë Ozempic, Wegovy dhe Rybelsus, mund të lidhen me një rrezik të shtuar për zhvillimin e një çrregullimi të rrallë të syrit, i njohur si neuropatia optike ishemike anteriore jo-arteritike (NAION)
Kjo gjendje që mund të çojë në humbje të pakthyeshme të shikimit.
Ky përfundim vjen pas një hetimi disa mujor nga Komiteti për Vlerësimin e Rrezikut në Fushën e Farmakovigjilencës (PRAC) të EMA-s, i cili konfirmoi një lidhje të mundshme mes përdorimit të semaglutidës dhe zhvillimit të NAION-it, një çrregullim që ndodh për shkak të reduktimit të rrjedhës së gjakut në nervin optik.
Rreziku është i rrallë, por real: Sipas EMA-s, ky efekt anësor konsiderohet "shumë i rrallë", që do të thotë se mund të prekë deri në një në 10,000 pacientë. Megjithatë, te pacientët me diabet që marrin semaglutide, rreziku për zhvillimin e NAION është dyfish më i lartë në krahasim me ata që nuk e marrin këtë substancë.
Përditësime në informacionin e produktit
EMA ka kërkuar që informacioni mbi produktet që përmbajnë semaglutidë të përditësohet me paralajmërime të qarta për këtë rrezik të mundshëm. Vendimi përfundimtar për këtë ndryshim do të merret nga Komisioni Evropian, transmeton Telegrafi.
Rritja e përdorimit dhe shqetësimet për sigurinë
Këto barna, të prodhuara nga kompania daneze Novo Nordisk, kanë njohur një rritje të jashtëzakonshme të popullaritetit vitet e fundit, jo vetëm për efektet e tyre në kontrollin e diabetit të tipit 2, por edhe për humbjen e peshës, çka ka çuar në përdorim të gjerë përtej indikacioneve të miratuara.
Njoftimi i EMA-s vjen në një moment kur po shtohet debati publik rreth sigurisë afatgjatë të ilaçeve për humbje peshe, të promovuara shpesh edhe nga figura publike dhe të famshëm.
Çfarë duhet të dini si pacient apo mjek?
EMA nuk rekomandon ndërprerjen e trajtimit me semaglutidë, por këshillon vigjilencë të shtuar si nga mjekët ashtu edhe nga pacientët. Çdo simptomë e mundshme e shikimit, si mjegullim i papritur ose humbje vizuale, duhet të raportohet menjëherë dhe të trajtohet me seriozitet maksimal. /Telegrafi/
