Rrëmbim për shkak të një borxhi të vjetër, policia arreston dy persona në Pejë

Drejtoria Rajonale e Policisë në Pejë, më datë 17 dhjetor 2024, rreth orës 11:25, ka pranuar një informacion nga një dëshmitar, i cili ka deklaruar se mëngjesin e sotëm, rreth orës 10:07, ka marrë një thirrje telefonike nga shoku i tij.

Sipas dëshmisë, dy persona nga qyteti i Ferizajt kishin kontaktuar viktimën lidhur me një borxh të vjetër të vëllait të tij.

Pas takimit me të dyshuarit, viktima është rrëmbyer dhe është dërguar në drejtim të panjohur.

Hetuesit e Sektorit Rajonal për Hetime, pas një pune intensive, kanë arritur të sigurojnë informacion për lokacionin e të dyshuarve.

Në koordinim me Stacionin Policor në Podujevë, dy të dyshuarit janë arrestuar në komunën e Podujevës.

Të dyshuarit e arrestuar janë sjellë në Drejtorinë Rajonale të Policisë në Pejë, ndërsa viktima kishte pësuar lëndime trupore dhe i është ofruar tretman mjekësor.

Të gjitha veprimet janë ndërmarrë në koordinim të plotë me Prokurorin e Shtetit.

Pas intervistimit nga hetuesit, me vendim të Prokurorit të Shtetit, dy të dyshuarit janë ndaluar për 48 orë./Telegrafi/