Rikthehen eskursionet e nxënësve – Drejtoria e Arsimit: Tash kontrollohen nga menaxherët e kontratës

Pas një ndërprerjeje njëvjeçare, Komuna e Gjilanit ka vendosur të rikthejë organizimin e ekskursioneve për nxënësit e shkollave fillore dhe të mesme. Drejtoria Komunale e Arsimit (DKA), në bashkëpunim me Zyrën e Kryetarit, ka ndarë mbi 157 mijë euro për këtë aktivitet, i cili është përshkruar si një iniciativë sociale për të lehtësuar barrën financiare të familjeve.

Vendimi ka ngjallur reagime të shumta, përfshirë edhe kundërshtime nga opozita komunale, e cila e ka cilësuar këtë si “keqpërdorim të buxhetit.

Në një prononcim për Telegrafint, drejtori i Drejtorisë së Arsimit në Gjilan, Shpend Nuhiu, tha se rikthimi i ekskursioneve nuk është ndonjë risi, por një vazhdimësi e praktikave të mëhershme.

Lexo po ashtu Kryetari i Komunës së Gjilanit ndan mbi 157 mijë euro për ekskursionin e nxënësve – opozita e cilëson keqpërdorim të buxhetit

“Vitin e kaluar, si drejtori as nuk e kemi ndalur, e as nuk e kemi lejuar. Ka ardhur si ndalesë nga Zyra e Kryetarit,” tha Nuhiu për Telegrafin.

Në lidhje me ndalimin e ekskursioneve vitin e kaluar, Nuhiu sqaroi se arsyeja kryesore ka qenë mungesa e një qasjeje të unifikuar nga shkollat.

“Vitin e kaluar secila shkollë në mënyrë të pavarur ka zgjedhur destinacionin që dëshironin të vizitonin. Për shkak të kësaj, ka pasur dyshime për mundësi të keqpërdorimeve apo rreziqeve të tjera. Ndërsa sivjet, me financimin nga komuna, do të ketë përcaktohet qyteti që do të vizitohet dhe do të ketë një organizim më të përpiktë dhe më të sigurt.”

Lidhur me menaxhimin e sigurisë, Nuhiu konfirmon se janë marrë masa konkrete për të garantuar një ambient të sigurt për nxënësit. Sipas tij, në çdo klasë do të jenë të pranishëm kujdestarë, drejtori i shkollës si dhe përfaqësues nga prindërit.

“Kjo bie nën ombrellën e organizimit të menaxherëve të kontratës të cilët do të jenë përgjegjës për mbikëqyrjen e zbatimit të saj. Siguria në transport, akomodim dhe organizime grupore është e paraparë nga vetë kontrata”, tha ai.

Ai sqaron se këtë vit është ndryshuar qasja përmes një organizimi të centralizuar që synon të lehtësojë barrën për prindërit dhe shkollat.

“Kemi vendosur ta heqim barrën financiare nga prindërit dhe nga shkollat, duke e centralizuar organizimin përmes një procedure të rregullt të prokurimit. Kështu do të ketë mbikëqyrje më të madhe dhe menaxhim të duhur të kontratës.”

I pyetur nëse ka qenë i përfshirë në vendimmarrje për këtë vit, Nuhiu theksoi se DKA ka bërë kërkesën, e cila më pas është proceduar nëpërmjet Drejtorisë së Financave dhe ka përfunduar në Zyrën e Kryetarit. Në fund, sipas tij është njësia e prokurimit që ka bërë publikimin.

Sa i përket interesimit të nxënësve dhe prindërve, drejtori tha se ka pasur kërkesa të drejtpërdrejta për rikthimin e ekskursioneve.

“Kjo është çështje madhore për ta. Ne kemi mbajtur takim enkas për këtë dhe kemi diskutuar mbi kërkesat që na janë adresuar nga nxënësit dhe prindërit nëpërmjet takimeve të organizuara.”

Ndërsa, kryetari i Këshillit të Nxënësve në Gjilan, And Jashari, tha për Telegrafin se kanë mbajtur takime paraprake ku edhe kanë adresuar kërkesën për rikthim të një organizimi të tillë.

“Ne kemi mbajtur takime edhe me drejtorin e arsimit edhe me kryetarin ku kemi adresuar kërkesën për me e rikthy eskursion dhe si përfundim kemi rënë dakord të organizohet sërish. Organizime do të ketë edhe plan konkret për menaxhimin e sigurisë mbi organizimin”, tha Jashari.

Sa i përket ndarjes së buxhetit mbi këtë organizim, Nuhiu thotë se bie në kuadër të kodit buxhetor për mallra dhe shërbime.

“Në kodin buxhetor për mallra dhe shërbime nuk ka ndonjë planifikim specifik. Ky nuk është projekt apo investim kapital. Ky është një organizim social”, tha ai.

I pyetur nëse është e mjaftueshme shuma e ndarë për këtë organizim, drejtori njoftoi se kanë bërë një paramasë dhe se kjo është maksimumi që mund të bëjnë.

“Ne e kemi analizuar një paramasë dhe kjo është maksimumi që mund të bëjmë. Brenda kësaj vlere po, mirëpo mbi këtë shumë nuk do të kishim mundësi.”

Në fund, Nuhiu la të hapur mundësinë që në të ardhmen të organizohen ekskursione edhe për nxënësit me rezultate të dalluara, si formë shpërblimi dhe motivimi.

“Kjo është një veprimtari sociale që i ka munguar komunës.” /Telegrafi/