Rikonfirmon MPB: Pavarësisht kufizimit të lëvizjes, gazetarët dhe punëtorët e medieve nuk pengohen në përmbushjen e detyrave të tyre

Ministria e Punëve të Brendshme ka rikonfirmuar se pavarësisht kufizimit të lëvizjes, gazetarët dhe punëtorët e medieve nuk pengohen në përmbushjen e detyrave të tyre. Lajmin e ka bërë të ditur Asociacioni i Gazetarëve të Kosovës.

AGK thotë se ka pranuar shqetësime nga disa gazetarë, ku që nga dita e enjte do të gjobiten nëse shkelin orarin e lëvizjes së lirë.

“Asociacioni i Gazetarëve të Kosovës ka pranuar shqetësime nga disa kolegë gazetarë se nga dita e enjte do të gjobiten njëjtë si qytetarët e tjerë nëse shkelin orarin e lëvizjes së lirë. Në lidhje me këtë, AGK menjëherë ka kontaktuar Ministrinë e Punëve të Brendshme, e cila ka bërë të ditur se nuk ka ndryshuar asgjë në vendimin për lejimin e lëvizjes për gazetarët dhe punonjësit medial”, thotë AGK, përcjell Telegrafi.

Në përgjigjen drejtuar AGK-së, MPB-ja ka bërë të qartë se për lëvizjen e gazetarëve dhe punonjësve medial vlejnë rregullat e deritanishme.

“Ju njoftojmë se asgjë nuk ka ndryshuar në këtë drejtim, vlejnë rregullat e deritanishme për zhvillimin e aktiviteteve të tyre”, thuhet në përgjigjen e MPB-së.

AGK u bën thirrje gazetarëve, kameramanëve, fotoreporterëve dhe punonjësve të tjerë medial që gjatë gjithë kohës të mbajnë me vete ID e tyre të punës, të cilat dëshmojnë angazhimin e tyre profesional. /Telegrafi/