Rezeva Federale do të publikojë procesverbalin, Britania në fokus

Java që vjen pritet me interes të madh nga tregjet financiare. Rezerva Federale do të publikojë në mesjavë procesverbalin e takimit të fundit, dhe një ndryshim toni mund të gjenerojë jo pak luhatshmëri në tregje dhe sidomos në kursin e këmbimit valutor.

Investitorët presin me padurim të zbërthejnë procesverbalin në kërkim të një sinjali për ndërhyrjen e radhës së institucionit në politikat monetare. Rezerva Federale tashmë ka edhe një mundësi të vetme për të rritur normat e interesit përpara zgjedhjeve presidenciale të muajit Nëntor.

Pavarësisht kësaj, ekspertët vazhdojnë të besojnë se ndërhyrja do të vijë në muajin dhjetor. Gjatë javës që vjen priten edhe të dhënat mbi ecurinë e çmimeve të konsumit në Mbretërinë e Bashkuar.

Pritshmëritë flasin për një presion të ulët inflacionist. Britania do të publikojë edhe të dhënat e shitjeve me pakicë gjatë javës. Japonia nga krahu tjetër do të publikojë të dhënat e Prodhimit të Brendshëm Bruto për tremujorin e dytë të vitit, ndërkohë që pritshmëritë flasin për një normë rritje pranë 0.7% në terma vjetorë. /Telegrafi/