Regjistrimi i bujqësisë, realizohet afër 85%

Projekti i Regjistrimit të Bujqësisë deri sot, në ditën e 17 të tij, ka arritur të realizohet në afër 85 për qind.

Puna në terren nuk ka ngecur në ndonjë vështirësi dhe ekonomitë familjare, pra pjesa më e madhe e tyre, i janë përgjigjur me gatishmëri të plotë regjistrimit të këtij projekti.

Monitorimi i punës në terren nga Agjencia e Statistikave të Kosovës sot ka vazhduar në Komunën e Vushtrrisë, komune kjo e cila deri në sot ka regjistruar 90 për qind të ekonomive familjare.

Për kryeshefin e ASK-së, Isa Krasniqi, problem mbesin vetën katër komunat në veri të Kosovës të cilat deri më sot nuk i janë përgjigjur projektit të Regjistrimit të Bujqësisë.

Sipas tij, procesi i punës nëpër 34 komunat e Kosovës po shkon ashtu siç është pritur nga kjo ASK-ja. “Në bazë të asaj që kemi marrë informnacione sot por edhe ditët e kaluara, prej gjithë terrenit të Republikës së Kosovës por edhe në Komunën e Vushtrrisë, procesi po ecën jashtëzakonisht mirë, pra, ashtu siç është planifikuar dhe shihet që do të përfudnojë ashtu edhe siç është planifikuar, pra me 20 nëntor të këtijviti…. Në bazë të përqindjes, ne mund të flasim me shifra të përafërta jo komplet të sakta, kemi një përqindje të realizueshmërisë prej 80 deri në 85 për qind të këtij projekti”, ka thënë ai.

ASK sot është në ditën e 17 të projektit të Regjistrimit të Bujqësisë. Regjistrimi pritet të përfundojë këtë të enjte, më 20 nëntor. /Telegrafi/