Reciprociteti për targat, Lajçak zhvilloi takime të ndara me Bislimin e Petkoviqin

Përfaqësuesi Special i Bashkimit Evropian për dialogun Kosovë-Serbi, Miroslav Lajçak, ka zhvilluar takime të ndara me kryenegociatorët në dialog, zëvendëskryeministrin e Kosovës, Besnik Bislimi dhe atë të palës serbe, Petar Petkoviq.

Lajçak, përmes një postimi në rrjetin social Twitter ka thënë se kishte dy takime të ndara me kryenegociatorët e Kosovës dhe Serbisë për të diskutuar mënyrat për të zgjidhur krizën aktuale.

“Ne do të vazhdojmë diskutimet tona gjatë gjithë ditës”, ka shkruar Lajçak, transmeton Telegrafi.

This morning, I had two separate meetings with the Chief negotiators of Kosovo and Serbia to discuss ways to solve the current crisis. We will continue our discussions throughout the day. pic.twitter.com/PktLJxLk3R

— Miroslav Lajčák (@MiroslavLajcak) September 29, 2021

Më herët, zëvendësndihmës sekretari amerikan për Çështje të Evropës dhe Euroazisë, Gabriel Escobar, bëri të ditur se takua në Bruksel me zëvendëskryeministrin e Kosovës, Besnik Bislimi dhe me shefin e zyrës për Kosovën në Qeverinë e Serbisë, Petar Petkoviq.

“Prioritet numër një është që të ulen tensionet. Ato janë shumë të larta tash dhe duhet të ulen menjëherë”, tha Escobar.

Takimi në Bruksel i kryenegociatorëve për çështjet teknike në dialogun Kosovë – Serbi, vjen pas tensionimit të raporteve midis dy vendeve si pasojë e bllokimit të rrugëve në veri të Kosovës nga serbët lokalë, pas vendimit të Qeverisë së Kosovës për aplikimin e reciprocitetit për targat e automjeteve serbe, që hyjnë në Kosovë./Telegrafi/