Reagon edhe AAK ndaj ambasadës turke: Kërkesa juaj e pavend dhe e panevojshme

Pas kërkesës së Ambasadës së Turqisë që Qeveria e Kosovës të marrë masa ndaj gazetarit Berat Buzhala që bëri komente në Facebook rreth grusht shtetit në Turqi, ka reaguar edhe Aleanca për Ardhmërinë e Kosovës.

“Kërkesa e Ambasadës së Republikës së Turqisë në Prishtinë, që Qeveria e Kosovës të ndërmarrë masa ligjore ndaj gazetarit Berat Buzhala, për shkak të një statusi të tij në Facebook, që lidhet me ngjarjet në Turqi, aq më tepër kur ai është publikuar në cilësinë e një satire, konsiderojmë se është e pavend dhe e panevojshme”, thuhet në reagimin e AAK-së.

Partia e Ramush Haradinajt ka thënë se është kundër cenzurimit të çdo mendimi ndryshe, posaçërisht nëse ai është joformal dhe i mveshur me elemente satirike, si në rastin konkret, i cili besojmë se nuk mund të jetë në kundërshtim as me ligjet e Kosovës.

“Kosova është përcaktuar në rrugëtimin e saj drejt integrimit në Bashkimin Evropian dhe në NATO, dhe rrjedhimisht liria e shprehjes dhe e mendimit, është ndër vlerat themelore të këtij përcaktimi si dhe zhvillimit tonë si shoqëri dhe si shtet”, thuhet në reagim./Telegrafi/