LAJMI I FUNDIT:

Rasti i dënimit me 8 muaj për dhunimin e 15-vjeçares, miratimi i buxhetit nga Qeveria për vitin 2022 dhe rezultatet e zgjedhjeve lokale – top lajmet e javës

Rasti i dënimit me 8 muaj për dhunimin e 15-vjeçares, miratimi i buxhetit nga Qeveria për vitin 2022 dhe rezultatet e zgjedhjeve lokale – top lajmet e javës

Javën që po lëmë pas është bërë e ditur se Prokuroria ka iniciuar procedurën ndaj prokurores në rastin e të dënuarit për dhunimin e 15-vjeçares në Gjakovë.

Ndërkaq, po javën që po lëmë pas Qeveria e Kosovës ka miratuar buxhetin për vitin 2022.


Po gjatë javës janë shpallur rezultatet e zgjedhjeve lokale, ndërkaq të njëjtat janë certifikuar të premten me përjashtim të katër komunave.

Prokuroria inicion procedurën disiplinore ndaj prokurores në rastin e të dënuarit për dhunimin e 15-vjeçares

Kryeprokurori i Shtetit, Aleksandër Lumezi, ka kërkuar nga Kryeprokurori i Prokurorisë Themelore në Pejë, Agim Kurmehaj, si autoritet kompetent, që të rishqyrtojë lëndën penale të prokurores Lirije Morina dhe nga të gjeturat të ndërmarrë të gjitha veprimet e nevojshme sipas ligjit për përgjegjësinë disiplinore të gjyqtarëve dhe prokurorëve.

Prokuroria Themelore në Pejë, ka ndërmarr veprimet e para procedurale për gjetjet e shkeljeve disiplinore apo ndonjë shkelje tjetër eventuale nga bartësi i kësaj lënde.

Ndërsa Prokuroria bën të ditur se konform Ligjit për Përgjegjësinë Disiplinore të Gjyqtarëve dhe Prokurorëve, sipas detyrës zyrtare, ka iniciuar procedurën disiplinore ndaj prokurores, e cila ka përfaqësuar këtë lëndë.

“Prokuroria Themelore në Pejë, njofton opinionin publik lidhur me çështjen penale PP.nr.68/12, për veprën penale “Dhunimi”, nga neni 193, paragrafi 3 i KPK-së, se Kryeprokurori i kësaj prokurorie, Agim Kurmehaj, pas analizimit të gjitha shkresave të lëndës, konform Ligjit për Përgjegjësinë Disiplinore të Gjyqtarëve dhe Prokurorëve, sipas detyrës zyrtare, ka iniciuar procedurën disiplinore ndaj prokurores, e cila ka përfaqësuar këtë lëndë”, thuhet në komunikatë.

Ndërkaq, për vendimin gjykatës të hënën kishte reaguar edhe rrjeti i Grave të Kosovës (RrGK).

RrGK, konsideron se në këtë rast gjykata në Pejë ka dështuar të shqiptojë dënimin e merituar për dhunën ndaj vajzave.

Sipas tyre në këtë vendim, gjykata ka përdorur arsyetime të papranueshme e skandaloze, siç janë arsyetimet se “viktima nuk kishte pësuar lëndime”, dhe se “i akuzuari kishte sjellje korrekte”.

Rrjeti i Grave konsideron se arsyetime të tilla veçse vërtetojnë se viktima nuk ka qenë prioritet për Gjykatën Themelore në Pejë.

Ndryshe, edhe pse Kodi Penal i Kosovës parasheh dënimi për dhunim në rastin kur viktima është e mitur të jetë nga 5 deri në 20 vite burgim, gjyqtarja Florije Zatriqi, ka gjetur rrethana lehtësuese për të dyshuarin.

Qeveria miraton Buxhetin e vitit 2022 prej 2.75 miliardë euro, 8.7% më i lartë se i vitit 2021

Qeveria të premten ka mbajtur mbledhjen e radhës ku është diskutuar dhe miratuar Projektligji i Buxhetit për vitin 2022.

Kryeministri Albin Kurti ka thënë se kësi buxhet asnjëherë më parë nuk ka pasur Kosova.

“Puna e mirë ka filluar dhe do të vazhdojë deri në fund të mandatit”, është shprehur ai.

Ai ka thënë se me këtë buxhet do të ndërtohen çerdhe e do të ndihmohen pensionistë.

“Buxheti i planifikuar për vitin 2022 parasheh investim në arsim e edukim me ndërtimin e 50 çerdheve të reja në tërë vendin, shkollimin falas për të gjithë studentët, si dhe ndarjen e 2 mijë bursave shtesë për studentët më të mirë. Më tutje, Buxheti i vitit 2022 synon të ndihmojë edhe ekonominë familjare me ndarjen e 45 milionë euro për të mbështetur nënat me Shtesat për Lehona e Shtesat për Fëmijë, ndarjen e 35 milionë eurove më shumë për kategoritë pensionale e sociale, ashtu që asnjë pension të mos jetë nën 100 euro, dhe shtesat për skemat sociale prej 30% të bëhen të përhershme”.

Kurti po ashtu ka njoftuar se me buxhetin e tillë do të bashkohen Prizreni e Tetova e do të ndihmohet edhe Lugina e Preshevës.

Kryeministri Albin Kurti u zotua se me dhjetë milionë euro të ndara do të furnizojnë policinë dhe zjarrfikësit me pajisje moderne e të sigurta.

“Ushtrinë e kemi projektin tonë madhor andaj për herë të parë kemi ndarë buxhet prej 100 milionë euro apo 1,3 për qind të bruto-produktit vendor. E synimi është që brenda mandatit ta sjellim 2 për qind të bruto-produktit vendor, aq sa e kërkon standardi i NATO-s”, ka thënë ai.

Më tej, ai tha se me kursimet në paga që ka bërë menaxhmenti i ri i AKP-së, ato mjete i kanë orientuar në ushtri dhe si rezultat do të rekrutojnë 800 ushtarë të rinj.

E, ministri i Financave, Hekuran Murati ka prezantuar buxhetin për vitin 2022, ku theksoi se e ka objektiv konsolidimin e ringjalljes ekonomike, riorientimin e ekonomisë drejt prodhimit dhe përkrahjen e punësimit.

“Si tërësi buxheti i vitit 2022 pritet të jetë 2 miliardë e 748 milionë euro, duke shënuar rritje prej 8.7% krahasuar me buxhetin e rishikuar të këtij viti. Të hyrat buxhetore pritet të jenë në vlerë prej 2,364 milionë euro, gjë që paraqet rritje prej 15% në krahasim me vitin paraprak.”, deklaroi Murati.

KQZ certifikon rezultatet e zgjedhjeve lokale – mbeten pa u certifikuar katër komuna

Komisioni Qendror i Zgjedhjeve ka certifikuar të premten rezultatet përfundimtare të raundit të parë të zgjedhjeve për kryetarë të komunave, por në këtë certifikim nuk janë përfshirë komuna e Shtimes, Ferizajt, Podujevës e Kllokotit, për shkak të ankesave.

Kryetari i Komisionit Qendror të Zgjedhjeve, Kreshnik Radoniqi ka thënë se kanë komunikuar me Panelin Zgjedhor për Ankesa dhe Parashtresa dhe Gjykatën Supreme, të cilat kanë kërkuar që rezultatet e katër komunave të mos certifikohen për shkak se ka ankesa në procedurë.

“Sot është përmbyllur afati i ankesave lidhur me rezultatet përfundimtare që një ditë më herët janë shpallur nga Komisioni Qendror i Zgjedhjeve. Gjatë dita e sotme kemi komunikuar e dy institucionet Panelin Zgjedhor për Ankesa dhe Parashtresa dhe Gjykatën Supreme. Nga këto institucione kemi marr konfirmimin se rezultati i të cilave komunave nuk mund të certifikohen pasi ka ankesa dhe shqyrtimi i tyre nuk ka përfunduar ende. Prandaj, ne sot kemi në rend të ditës certifikimin e rezultateve përfundimtare të raundit të parë të zgjedhjeve lokale për 35 komunave, pra pjesë e certifikimit të sotëm nuk janë rezultatet e raundit të parë për zgjedhje lokale të komunës së Shtimes, Ferizajt, Podujevës dhe Kllokotit, ndërsa për komunat tjera janë certifikuar“, është shprehur ai.

Në këtë mbledhje të KQZ-së, kryeshefi i Sekretariatit të KQZ-së, Burim Ahmetaj kërkoi që 91 vendvotime të rinumërohen si rezultat i krahasimit dhe mos shënimit të saktë të votave duke i krahasuar formularët e rezultatet të kandidatëve me fletët llogaritëse të kandidatëve.

Komunat që janë zgjedhur kryetar në raundin e parë të zgjedhjeve lokale janë: Deçani, Mitrovica e Jugut, Leposaviqi, Lipjani, Novobërda, Peja, Shtërpca, Suharekë, Skenderaj, Zubin Potoku, Zveçani, Graçanica, Ranillugu, Parteshi, Mitrovica e Veriut.

Ndërsa, komunat që shkojnë në balotazh janë: Drenasi, Gjilani, Gjakova, Kaçaniku, Dragashi, Fushë Kosova, Istogu, Obiliqi, Klina, Kamenica, Rahoveci, Podujeva, Prishtina, Vitia, Prizreni, Juniku, Malisheva, Vushtrria, Shtime, Kllokoti, Mamusha. /Telegrafi/

 

Në trend Lajme

Më shumë
Qeveria e RMV-së vendosi: 24 prilli dhe 8 maji ditë jo pune për të gjithë qytetarët

Qeveria e RMV-së vendosi: 24 prilli dhe 8 maji ditë jo pune për të gjithë qytetarët

Lajme
Kurti: Zëvendësdrejtori i policisë që u ndalua dje nga Serbia, është dërguar në Rashkë

Kurti: Zëvendësdrejtori i policisë që u ndalua dje nga Serbia, është dërguar në Rashkë

Lajme
Lirohen policët e ndaluar në Serbi, përveq zv.drejtorit Jankoviq

Lirohen policët e ndaluar në Serbi, përveq zv.drejtorit Jankoviq

Lajme
Kryetari i Dhomës së Përfaqësuesve, Johnson: Putini mund të synojë Ballkanin, nëse lejohet

Kryetari i Dhomës së Përfaqësuesve, Johnson: Putini mund të synojë Ballkanin, nëse lejohet

Lajme
Pronari i “Zhitia Turist” tregon se çfarë u është thënë udhëtarëve të ndaluar nga Serbia në kufi

Pronari i “Zhitia Turist” tregon se çfarë u është thënë udhëtarëve të ndaluar nga Serbia në kufi

Lajme
Shpërthen një granatë dore në oborrin e një shtëpie në Zveçan

Shpërthen një granatë dore në oborrin e një shtëpie në Zveçan

Lajme
Kalo në kategori