Raportohet rasti i parë, varianti i ri i COVID-19 arrin edhe në SHBA

Rasti i parë i raportuar në SHBA i variantit shumë infektiv të COVID-19 që u shfaq fillimisht në Mbretërinë e Bashkuar është konfirmuar në shtetin e Kolorados.

Sipas mediave të huaja, përcjell Telegrafi, pacienti, një burrë në të 20-at e tij pa histori të kohëve të fundit të udhëtimit, aktualisht është në izolim.

Zyrtarët shëndetësorë të shtetit thanë se po punonin për të identifikuar kontaktet dhe rastet e tjera të mundshme të variantit të ri.

Një lajm i tillë vjen ndërsa presidenti i zgjedhur amerikan Joe Biden kritikoi shpërndarjen e vaksinave nga administrata Trump.

Ai tha se programi po ndodhte prapa orarit të duhur.

SHBA ka regjistruar më shumë se 19 milionë infeksione dhe më shumë se 337,000 vdekje nga coronavirusi, shifrat më të larta në botë.

Varianti i ri është dukshëm më i transmetueshëm se llojet e mëparshme, por jo domosdoshmërisht më i rrezikshëm për të infektuarit, thonë ekspertët.

Në një deklaratë të martën, guvernatori i Kolorados, Jared Polis tha se pacienti i infektuar ishte në izolim në Elbert County pranë Denver.

Zyrtarët e shëndetit publik po kryenin “një hetim të plotë”, tha ai, dhe asnjë infeksion nuk ishte zbuluar midis kontakteve të ngushta deri më tani.

Ndryshe, rastet e variantit të ri janë shfaqur në të gjithë botën dhe dy infeksionet e para të njohura në kontinentin e Amerikës së Veriut dolën në dritë në Kanada gjatë fundjavës. /Telegrafi/