Raporti i YAHR: Kuvendi Komunal i Lipjanit miratoi 27 vendime dhe një rregullore për gjashtë muaj

Organizata e shoqërisë civile “Youth Association for Human Rights (YAHR)”, ka zhvilluar një monitorim të punës së Kuvendit Komunal të Lipjanit gjatë periudhës janar – qershor të këtij viti. Ky monitorim kishte për qëllim vlerësimin e performancës së kuvendarëve si përfaqësues të zgjedhur të qytetarëve.

Monitorimi ishte bazuar në aktivitetet e seancave plenare dhe ndërveprimin e kuvendarëve me ekzekutivin komunal, duke identifikuar dhe vlerësuar angazhimin dhe pjesëmarrjen e tyre në diskutime, ngritjen e çështjeve dhe pyetjeve drejtuar për shqyrtimin e çështjeve të ndryshme.

Gjatë kësaj periudhe, sipas kësaj organizate Kuvendi Komunal i Lipjanit zhvilloi 6 seanca plenare. Në këto seanca, u aprovuan një sërë vendimesh (27 në total), një rregullore ose plan komunal dhe u shqyrtuan 7 raporte dhe informacione të paraqitura nga ekzekutivi komunal.

Këto procese tregojnë pjesëmarrjen dhe aftësinë e Kuvendit për të kryer detyrat e saj ligjore dhe për të mbështetur zhvillimin e komunitetit lokal. Bazuar në vlerësimin e bërë nga YAHR, disa kuvendarë dalin në pah për angazhimin e tyre të lartë dhe kontributin në punën e Kuvendit Komunal, por kishte edhe të tillë që nuk u angazhuan fare

Bekim Krasniqi, drejtor i kësaj organizate ka thënë për Telegrafin se monitorimi i punës së Kuvendit Komunal ndikon në përmirësimin e përgjegjshmërisë dhe transparencës së proceseve vendimmarrëse në nivel lokal.

Sipas tij, këto qëllime përfshijnë adresimin e interesave dhe brengave të qytetarëve, andaj YAHR synon të përfaqësojë dhe të adresojë interesat e përgjithshme të qytetarëve të Lipjanit në mënyrë të paanshme dhe jo-partiake.

Krasniqi ka kërkuar angazhim më të madh të kuvendarëve të Lipjanit pasi që vazhdimisht ka kërkesa dhe ankesa të qytetarëve të cilat nuk po ngriten asnjëherë në kuvend.

”Përmes monitorimit të punës së kuvendarëve komunalë, organizata jonë punon për të siguruar që çështjet e rëndësishme për komunitetin të trajtohen dhe të diskutohen në mënyrë transparente dhe në përputhje me nevojat e qytetarëve. YAHR angazhohet të sigurojë që qytetarët të kenë qasje në informacionin e plotë dhe të rregullt lidhur me punën dhe vendimet e Kuvendit Komunal të Lipjanit. Kjo përfshin monitorimin e seancave plenare, diskutimet, vendimet e miratuara, si dhe çështjet e ngritura dhe pyetjet e drejtuar drejtuesve ekzekutiv”, ka thënë Krasniqi.

Sipas raportit të kësaj organizate, qëllimi kryesor i monitorimit të punës së kuvendeve komunale është të kontribuojë në forcimin e sistemit demokratik në Kosovë, duke promovuar llogaridhënien, transparencën dhe pjesëmarrjen e qytetarëve në proceset vendimmarrëse.

“Përmes vlerësimit të performancës së kuvendarëve, YAHR synon të inkurajojë një mjedis ku përgjegjshmëria dhe integriteti janë vlera themelore të administratës publike lokale. Këto qëllime përbëjnë një pjesë të strategjisë së YAHR për të siguruar që institucionet lokale të qeverisjes funksionojnë në mënyrë të përshtatshme dhe të përmbushin standardet e përgjegjshmërisë publike, duke i bërë ato më të qasshme dhe të përgjegjshme ndaj komunitetit lokal”,thuhet në raport

Sipas raportit të kësaj organizate, gjatë periudhës Janar-Qershor 2024 në Kuvendin Komunal të Lipjanit, subjektet politike kanë qenë të përfshira aktivisht në debatet dhe diskutimet e rregullta. Analiza e pjesëmarrjes së tyre tregon se partitë opozitare kanë pasur një prezencë dominuese.

”Partia Demokratike e Kosovës ka qenë subjekti politik më i shpeshtë në debatet e Kuvendit Komunal të Lipjanit, duke zhvilluar 60 diskutime, ose përqindje të pjesëmarrjes prej 44.78%. Pastaj, Lëvizja Vetëvendosje me 48 diskutime të zhvilluara, që përfaqësojnë 35.82% të pjesëmarrjes. Lidhja Demokratike e Kosovës (LDK) është e treta në numër të diskutimeve me 24 sesione, ose 17.91% të pjesëmarrjes. Aleancën për Ardhmërinë e Kosovës (AAK) përfshin veten me vetëm 2 diskutime, që përfaqësojnë 1.49% të pjesëmarrjes. Partia e Ashkalinjve për Integrim (PAI) nuk ka pasur asnjë diskutim të zhvilluar në periudhën janar-qershor, duke treguar një mungesë të vazhdueshme të aktivitetit në Kuvendin Komunal të Lipjanit”,thuhet në raport.

Lexo raportin e plotë për aktivitetet e kuvendit në Lipjan:  Raport-monitorues-1-2024