Rama dhe Zelensky nënshkruajnë deklaratë për mbështetjen e pakushtëzuar të Ukrainës

Kryeministri i Shqipërisë, Edi Rama, ka nënshkruar deklaratë të përbashkët me Presidentin e Ukrainës, Volodymyr Zelensky, për mbështetjen e pakushtëzuar të Ukrainës.

Kjo deklaratë është nënshkruar në selinë e Organizatës së Kombeve të Bashkuara në New York të Shteteve të Bashkuara të Amerikës.

“Selia e OKB, New York, nënshkrimi i deklaratës së përbashkët me Presidentin Volodymyr Zelensky, për mbështetjen e pakushtëzuar të Ukrainës”, ka shkruar Rama në llogarinë e tij në Facebook.

Presidenti ukrainas, Volodymyr Zelensky i ka thënë të mërkurën Këshillit të Sigurimit të Kombeve të Bashkuara se pushtimi rus në shtetin e tij është “kriminal” dhe ka thënë se Moskës duhet t’i hiqet e drejta e vetos në këtë institucion të OKB-së.

“Bota duhet ta di të vërtetën për këtë luftë”, ka thënë Zelensky teksa në të njëjtën tavolinë ka qenë ambasadori rus në OKB.

“Është agresion kriminal dhe i paprovokuar nga Rusia në kombin tonë, me qëllim të marrjen së territorit dhe burimeve të Ukrainës”.

Takimi është drejtuar për herë të parë nga Shqipëria, përkatësisht kryeministri i saj, Edi Rama.

Sekretari i Përgjithshëm i Kombeve të Bashkuara, Antonio Guterres ka thënë në takim se lufta e Rusisë në Ukrainë “është duke i rritur tensionet gjeopolitike dhe ndasitë, po e kërcënon stabilitetin rajonal, po rrit kërcënimet bërthamore dhe po krijon çarje edhe më të thella në një botë multipolare”.

Kjo është hera e parë që Zelensky ka marrë pjesë fizikisht në një seancë të Këshillit të Sigurimit, prej nisjes së luftës në Ukrainë, në shkurt të vitit 2022.

Para nisjes së takimit, ambasadori rus në OKB, Vassily Nebenzia është deklaruar kundër fjalimit të Zelenskyt.

“Dua t’i siguroj kolegët tanë rusë dhe të gjithë këtu që ky nuk është operacion special i Presidencës shqiptare. Ekziston një zgjidhje për këtë. Nëse ju pajtoheni, ju e ndalni luftën dhe presidenti Zelensky nuk flet”, ka thënë kryeministri shqiptar Rama.

Në 19 muajt e fundit, Këshilli i Sigurimit është takuar dhjetëra herë për të diskutuar për Ukrainën, mirëpo nuk ka mundur të vendosë për diçka për çështjen e vetos që e gëzon Rusia, si anëtare e përhershme e këtij trupi.