Rama: Vazhdon aksioni duke kapur qen në oborrin e QKUK-së dhe duke i dërguar për trajtim adekuat

Kryetari i Prishtinës, Përparim Rama ka njoftuar se kanë vazhduar me aksion duke kapur qen në oborrin e QKUK-së, dhe duke i dërguar për trajtim adekuat.

Rama thotë se ky proces do të vazhdon edhe në pjesë tjera të kryeqytetit, transmeton Telegrafi.

“Jemi të angazhuar me përkushtim maksimal për zgjidhjen e sfidës së qenve endacakë, duke realizuar aksione të vazhdueshme për kapjen dhe trajtimin e tyre. Edhe sot kemi vazhduar me aksion duke kapur qen në oborrin e Qendrës Klinike Universitare të Kosovës të cilët i kemi dërguar për trajtim adekuat. Ky proces po zhvillohet jo vetëm në këtë zonë, por edhe në pjesë të tjera të kryeqytetit dhe do të vijojë në mënyrë të rregullt”, ka pohuar ai.

Tutje, ai ka shkruar se “numri i personave që kërkojnë adoptimin e qenve endacakë është në rritje”.

“Për disa muaj do të largojmë nga rruga përmes trajtimit, strehimit dhe dhënies për adoptim mbi 1500 qen”.

“Megjithatë, për të siguruar një zgjidhje të qëndrueshme dhe afatgjatë, nevojitet përfshirja dhe mbështetja më e madhe nga niveli qendror. Kryeqyteti mbetet i përkushtuar për të vazhduar këto përpjekje, në bashkëpunim të ngushtë me institucionet relevante, duke kërkuar një zgjidhje gjithëpërfshirëse dhe efektive”, ka theksuar ai.

Rama shkruan se “vetëm së bashku mund t’i japim fund këtij problemi, të cilin shumica e komunave të vendit nuk kemi mundësi ta zgjidhim pa ndihmë”./Telegrafi/