Qyteti i Pejës e nderon me titullin ‘Qytetar nderi’ gjyshin e Rita Orës, regjisorin Besim Sahatçiu

Besim Sahatçiu ishte një nga regjisorët shqiptarë më të njohur në periudhën e Ish-Jugosllavisë.

I lindur dhe rritur në qytetin e Pejës, prej edhe nga ka origjinë familja e tij, Sahatçiu la gjurmë në kinematografinë e atëhershme, fama e të cilit u shtri edhe jashtë kufijve të Kosovës.

E si ‘dardha që pikon nën dardhë’, një sukses të ngjashëm, por të përmasave edhe më të mëdha e gëzon sot njashtu edhe mbesa e tij, këngëtarja shqiptare me famë botërore, Rita Ora.

Të hënën, Komuna e Pejës ka ndarë një mirënjohje të veçantë për artistin e madh të kësaj familjeje. Përkatësisht, të ndjerit i është dhënë titulli “Qytetar nderi” nga i pari i komunës, në një ceremoni modeste, ku mirënjohjen e ka pranuar bashkëshortja e tij, Besë Sahatçiu.

Lexo po ashtu Rita Ora i mburret botës: Gjyshi im u nderua me pullën e tij postare në Kosovë, për kontributin e tij të jashtëzakonshëm në film

Lidhur me këtë nderim, në rrjetet sociale reagoi babai i artistes Rita Ora, Besnik Sahatçiu (Ora), duke publikuar disa fotografi nga ceremonia dhe disa të tjera nga e kaluara, të realizuara në Pejë.

View this post on Instagram

A post shared by Besnik Sahatciu Ora (@oranick)

“Faleminderit qytetit të Pejës për shpërblimin ‘qytetar nderi’ për Besim Sahatçiun, regjisorit të njohur pejan/kosovarë. Ja disa fotografi të Besimit në Pejë në Hotel Dukagjini, 1960, me Besa Sahatçiun. Dhe disa fotografi me pejanë të suksesshëm të asaj kohe dhe shokë të tjerë”, shkroi djali i regjisorit në Instagram.

Rita përndryshe ka treguar në disa intervista se ka qenë shumë e lidhur me gjyshin e saj, i cili gjithmonë e ka inkurajuar të ndërtojë karrierë jashtë vendit, për të prekur sukseset planetare të cilat i gëzon sot. /Telegrafi/