Punëtorët teknikë të sektorit privat thirrje deputetëve: Votojeni ndarjen e mjeteve nga Trusti

Federata Sindikale e Punëtorëve Teknikë të Sektorit Privat të Kosovës, iu ka bërë thirrje deputetëve që të enjten ta votojnë tërheqjen e një pjese të kursimeve nga Fondi Pensional (Trusti).

Përmes një komunikate për media, ata kanë kërkuar nga deputetët e Kuvendit që të bëhen të sinqertë me punëtorët e sektorit privat të Kosovës dhe ta votojnë këtë ligj.

“Duke u nisur nga gjendja e rëndë socio-ekonomike, nga inflacioni i lartë, varfri e përcjellë edhe nga periudhat e kaluara, nga kreditë e rënda që s’po mund t’ia dalim t’i shlyejmë, nga pagat sa për t’i thënë pagë, që as për një javë s’po na mbulojnë, duke u nisur nga ajo se nga ky popull dhe më mirë të themi shumica e punëtorëve të sektorit privat ju votuan me bindje se ju do ti mbroni interesit e tyre ligjore më mirë se të tjerët , ju bëj apel pozitë e opozitë që ta votoni ligjin për ndarjen e 30% të trustit. Së paku njëherë pas dy vitesh bëhuni të sinqertë me punëtorët e sektorit privat të Kosovës dhe votoni këtë ligj”, thuhen në deklaratën e punëtorëve teknikë të sektorit privat.

Ndryshe, Projektligji që mundëson tërheqjen e një pjese të kursimeve nga Trusti, sërish do të jetë në shqyrtim në seancën e së enjtes të Kuvendit të Kosovës.

Më 7 dhjetor 2022, Komisioni për Buxhet, Punë dhe Transfere kishte miratuar kalimin e propozimit për tërheqjen nga Trusti për ta dërguar në Kuvend. Nga nëntë vota, katër ishin për, tri kundër dhe dy abstenime. Deputetët që kanë abstenuar ishin Visar Korenica dhe Eman Rrahmani nga Lëvizja Vetëvendosje, ndërsa për ishte Duda Balje që është pjesë e koalicionit qeverisës.