Fillon greva në ATK, për tri orë nuk ofrohen shërbime

Sindikata e Punëtorëve të Administratës Tatimore të Kosovës pas ngritjes së kërkesave drejtuar Ministrisë së Financave, Punës e Transfereve dhe pas ripërtëritjes së dërgimit të shkresës së fundit, përmes të cilës i është dhënë afat prej 30 ditësh kanë vazhduar grevën e pezulluar.

Greva ka filluar nga ora 9:00 dhe do të zgjas deri ora 12:00, pra duke i ndërprerë për tri orë të gjitha shërbimet për tatimpaguesit, përcjell Telegrafi.

Kërkesat e tyre kanë të bëjnë me krijimin e kushteve të punës, propozim ndryshimi i statusit të ATK-së si dhe kompensimet tjera të shpenzimeve.

“Sindikata e Punëtorëve të Administratës Tatimore të Kosovës pas ngritjes së kërkesave drejtuar Ministrisë së Financave, dhe pas ripërsëritjes së dërgimit të shkresës së fundit me datë 9 qershor 2021, përmes të cilës i është dhënë afat prej 30 ditësh, dhe meqë nuk është pranuar përgjigje në lidhje me kërkesat e adresuara, Sindikata njofton që ditën e mërkure me datë 14 Korrik 2021, do të vazhdojë Grevën e pezulluar të datës 20 maj 2021. Greva do të filloj nga ora 9:00 deri 12:00, duke i ndërprerë të gjitha shërbimet për tatimpaguesit”, thuhet në njoftimin e Sindikatës.

Greva do mbahet në të gjitha Drejtoritë e Administratës Tatimore të Kosovës. /Telegrafi/