Publikohet Raporti Botëror i Lumturisë – për të tetin vit radhazi, Finlanda mbetet në vendin e parë

Çdo vit në Ditën Ndërkombëtare të Lumturisë, 20 Mars, Rrjeti i Zgjidhjeve për Zhvillim të Qëndrueshëm të OKB-së publikon Raportin Botëror të Lumturisë.

Në edicionin e vitit 2025, Finlanda kryeson sërish listën e vendeve më të lumtura në botë – për të tetin vit radhazi.

Vendet e tjera nordike ruajtën gjithashtu vendet e tyre nga viti i kaluar: Danimarka të dytin, Islanda e treta, Suedia e katërta dhe Norvegjia e shtata.

Bëhet e ditur se Lista kryesore e raportit, “Renditja e vendeve sipas vlerësimeve të jetës”, krahason përgjigjet e një prej më shumë se 100 pyetjeve në Sondazhin Botëror të Gallup.

Pyetja është: Në një shkallë nga zero deri në dhjetë, ku e vendosni jetën tuaj?

Këto “vlerësime të jetës” e vënë fokusin në kënaqësinë e njerëzve me jetën.

Raporti përdor një mesatare prej tre viteve më të fundit për të arritur në listën e tij të vendeve më të lumtura.

Një kornizë për ndërtimin e lumturisë

Kur një vend ka një reputacion të gjatë për lumturinë, njerëzit priren të pyesin se cila është receta.

Nuk ka asnjë përgjigje të vetme, sigurisht.

Sidoqoftë, Finlanda ka nxitur atë që ata e quajnë “infrastruktura e lumturisë”, shkruajnë mediat e huaja, përcjell Telegrafi.

Raportohet se vendi ka ndërtuar dhe ruajtur kulturën dhe institucionet sociale që përbëjnë bazën dhe kornizën për individët dhe komunitetet për të ndërtuar lumturinë e tyre.

Kombet mund të ndërmarrin hapa për të inkurajuar lumturinë – për të ndihmuar që lumturia të ndodhë.

Hulumtimet tregojnë se kënaqësia nga jeta lidhet me një shoqëri që funksionon mirë që ofron kujdes shëndetësor, siguri sociale dhe akses në tregun e punës.

Raporti Botëror i Lumturisë 2025 është 260 faqe. Çfarë tjetër ka në të?

Çdo vit, autorët gërmojnë në tema të lidhura me lumturinë për të paraqitur një pamje të gjerë të çështjeve që prekin njerëzit.

Fokusi në 2025 është “ndikimi i kujdesit dhe ndarjes në lumturinë e njerëzve”.

Si e masin ata diçka të tillë?

Ata shikojnë përgjigjet e njerëzve ndaj pyetjeve në lidhje me dashamirësinë e të tjerëve.

Nëse ju ka humbur portofolin dhe e ka gjetur një i huaj, një fqinj ose një oficer policie, a prisni që ta kthejnë?

Finlanda ka rezultate të larta në “treguesin e portofolit”, duke treguar se njerëzit u besojnë bashkëqytetarëve të tyre.

Raporti thotë, “të gjitha eksperimentet ndërkombëtare të hedhjes së portofolit kanë treguar se Finlanda dhe vendet e tjera nordike janë ndër vendet më të sigurta për të humbur portofolin tuaj.”

Lidhje me mirëqenien

Ekzistojnë gjithashtu të dhëna se sa shpesh njerëzit hanë së bashku.

Vaktet familjare mbeten një traditë e fortë në Finlandë: 81% e familjeve me fëmijë hanë së bashku të paktën një herë në ditë.

Ndryshe, dhënia e parave për bamirësi, puna vullnetare dhe ndihma e të huajve janë gjithashtu të lidhura me sjelljen e kujdesshme.

Ndërsa Finlanda nuk kryeson ato tabela, autorët e raportit sugjerojnë se ka faktorë të tjerë të përfshirë.

Kjo na kthen në infrastrukturën finlandeze të lumturisë.

Finlanda “ka sisteme shëndetësore, arsimore dhe mbështetëse sociale të disponueshme universale dhe me cilësi të lartë”, thekson raporti. /Telegrafi/