Pse mund të ketë pesë klube italiane në Ligën e Kampionëve sezonin e ardhshëm

Gara për t’u kualifikuar në Ligën e Kampionëve të sezonit të ardhshëm në Serie A vazhdon të mbetet e hapur, por pas një paraqitjeje jashtëzakonisht të fortë për skuadrat e Serie A në Evropë këtë sezon, mund të ketë pesë klube italiane në garën më të madhe sezonin e ri.

Interi tashmë ka rezervuar vendin në finalen e Stambollit më 10 qershor pasi mundi Milanin me rezultat të përgjithshëm 3-0, kështu që do të përballet me Real Madridin ose Manchester Cityn.

Kjo do të thotë se ata tani kanë dy rrugë të mundshme për t’u kualifikuar në edicionin 2023-24 të Ligës së Kampionëve, pasi ata mund të sigurojnë një vend top katërshe në Serie A ose të fitojnë Ligën e Kampionëve dhe të hyjnë automatikisht edhe në sezonin e ardhshëm.

Nëse do të fitonin, atëherë Interi dhe fituesi i Scudettos, Napoli do të ishin në vazon e parë në shortin për fazën e grupeve.

Gjysmëfinalet e Ligës së Evropës do të përfundojnë nesër në mbrëmje, ku Juventusi do të vizitojë Sevillan, ndërsa Roma luan si mysafirë ndaj Bayer Leverkusen.

Fituesi i Ligës së Evropës kualifikohet automatikisht në Ligën e Kampionëve sezonin e ardhshëm dhe kjo nuk është diçka që Roma apo Juve mund ta marrin si të mirëqenë.

Giallorossët e Jose Mourinhos janë aktualisht në vendin e gjashtë në Serie A, ndërsa Juventusi është ende në pritje të verdiktit të 22 majit për fitimet kapitale, ku kërkohet heqja e nëntë pikëve.

Lexo po ashtu Capello dhe Di Canio pajtohen për kundërshtarin më të mirë të Interit në finalen e Ligës së Kampionëve

Nëse Roma ose Juventusi fitojnë Ligën e Evropës duke mos përfunduar në top katërshen e Serisë A, atëherë do të jenë pesë klube italiane në garën më prestigjioz sezonin e ardhshëm.

Megjithatë, numri maksimal i klubeve nga një vend në Ligën e Kampionëve është pesë.

Pra, nëse Interi dhe Roma ose Juventusi do të fitonin trofe pa përfunduar në top katërshe, atëherë vetëm tre të parët në Serie A do të kualifikoheshin./Telegrafi/