U mori deri në 5 mijë euro për t’i dërguar në vendet e BE-së, Prokuroria ngrit aktakuzë ndaj të dyshuarit

Prokuroria Speciale e Republikës së Kosovës, ka ngritur aktakuzë në Gjykatën Themelore në Prishtinë – Departamenti Speciale, kundër të pandehurit B.M. për veprën penale “Kontrabandimi me migrantë”.

Kështu është bërë e ditur përmes një komunikate për medie nga Prokuroria Speciale, ku po ashtu bëhen të ditura edhe detaje.

Sipas komunikatës bëhet fjalë për migrantë nga regjioni i Prizrenit të cilëve i pandehuri B.M në bashkëpunim me të pandehurit B.A., S.R., R.D., H.P. dhe L.G dhe të tjerët u kishte marrë pages që silleshin deri në 5 mijë euro përsonave të interesuar për të migruar, për t’i dërguar përmes Serbisë në vende të ndryshme të Bashkimit Evropian.

“Prokuroria Speciale njofton se i pandehuri B.M. gjatë periudhës kohore nga janari i vitit  2013 deri më 14.07.2014, në regjionin e Prizrenit dhe tërë territorin e Kosovës, në bashkëpunim me të pandehurit B.A., S.R., R.D., H.P. dhe L.G dhe të tjerët, i kanë gjetur migrantët e interesuar për të dalë jashtë Kosovës në mënyrë ilegale pasi që ua kanë siguruar dokumentet e nevojshme, duke përfshirë pasaportat dhe lejet e qëndrimit, migrantëve të interesuar që të shkojnë në Bashkimin Evropian”, thuhet në këtë komunikatë.

E gjithë kjo ishte bërë në mënyrë të kundërligjshme dhe pas marrjes së pagesave nga migrantët që silleshin deri ne 5000 euro për person, i kanë dërguar migrantët përmes Serbisë në vende të ndryshme të Bashkimit Evropian, në mesin e të cilëve edhe migrantët: M.M., R.G., T.K., B.K., B.K., F.B., F.B., L.G., E.G., N.G., B.Q., I.S., M.Z., Y.Y., D.H., I.F., B.K., L.H.

“Me këto veprime i pandehuri B.M. në bashkëkryerje ka kryer veprën penale “Konrabandimi me migrantë”, në kundërshtim me nenin 170 paragrafi 1 lidhur me nenin 31 të KPRK-së. I akuzuar B.M. në shtator 2020, është ekstraduar nga Zvicra në Kosovë”, thuhet në komunikatë. /Telegrafi/